चिपळूण : चिपळूण तालुक्यातील वीर देवपाट आणि गुहागर तालुक्यातील काजुर्ली या दोन भागांना जोडणाऱ्या कापशी नदीवरील बहुप्रतिक्षित उच्चस्तरीय पुलाच्या उभारणीच्या दृष्टीने प्रशासकीय हालचालींना वेग आला आहे. मंत्रालयस्तरावरून प्राप्त झालेल्या स्पष्ट सूचनांनुसार सार्वजनिक बांधकाम विभागाच्या वरिष्ठ अधिकाऱ्यांनी मंगळवारी प्रस्तावित स्थळाची प्रत्यक्ष तांत्रिक पाहणी पूर्ण केली. तब्बल २९ वर्षांपासून प्रलंबित असलेल्या या जनहिताच्या पुलासाठी स्थानिक नागरिकांसह मुंबईकर ग्रामस्थ व लोकप्रतिनिधींनी मंत्रालय पातळीवर सातत्यपूर्ण पाठपुरावा लावून धरल्याने आता प्रत्यक्ष कामाच्या आशा पल्लवित झाल्या आहेत.
वीर आणि काजुर्लीदरम्यान संपर्क यंत्रणा सक्षम व्हावी म्हणून सर्वप्रथम १९९९ मध्ये या पुलाची मागणी पुढे आली होती, तर सन २००० पासून या संदर्भातील अधिकृत प्रशासकीय पत्रव्यवहार निरंतर सुरू आहे. सध्याच्या घडीला दोन्ही बाजूंच्या गावांतील नागरिकांना कापशी नदी ओलांडण्यासाठी लांबचा व अत्यंत त्रासदायक वळसा घालून ये-जा करावी लागते. प्रस्तावित पूल अस्तित्वात आल्यास हा खडतर प्रवास अत्यंत सुलभ आणि वेगवान होणार आहे. केवळ चिपळूण आणि गुहागरपुरताच हा पूल मर्यादित न राहता संगमेश्वर, रत्नागिरी तालुका तसेच थेट मुंबईच्या दिशेने ये-जा करणाऱ्या हजारो प्रवाशांसाठी तो एक महत्त्वाचा पर्यायी दुवा ठरणार असून, मुंबई-रत्नागिरी मार्गावरील अतिरिक्त अंतराचा वळसा वाचण्यास मोठी मदत लाभणार आहे.
तांत्रिक नियोजनानुसार, कापशी नदीवर उभारला जाणारा हा दुपदरी रस्ता असलेला पूल सुमारे १२० मीटर लांबीचा असेल. पावसाळ्याच्या दिवसांत नदीची पाणीपातळी प्रचंड वाढत असल्याने वाहतुकीत कोणताही अडथळा येऊ नये म्हणून आवश्यक उंची आणि रुंदी राखून हा उंच पातळीचा पूल उभारण्याचा स्पष्ट प्रस्ताव तयार करण्यात आला आहे. या प्रकल्पामुळे वीर व काजुर्ली परिसरातील ३५ हून अधिक गावे एकमेकांशी थेट जोडली जाणार असून, सुमारे २८ हजारांहून अधिक लोकसंख्येला याचा प्रत्यक्ष व अप्रत्यक्ष लाभ होणार आहे. इतकेच नव्हे तर शेतकरी आणि सर्वसामान्य जनतेसाठी हा मार्ग संजीवनी ठरणार असून स्थानिक व्यापार, कृषी उत्पन्न, बाजारपेठ, आरोग्य यंत्रणा, शिक्षण आणि पर्यटनाला यामुळे नवी दिशा मिळणार आहे.
गेल्या पावणेतीन दशकांपासून सुरू असलेल्या या लढ्यासाठी पंचायत समिती सदस्य संजय जावळे, ग्राम विकास मंडळाचे अध्यक्ष दीपक पवार, परीक्षित पावसकर, विशाल वीरकर, जयंत वीरकर आणि काजुर्लीचे पप्पू साळवी यांच्यासह वीर, पूर्वे, शिरंबे, वहाळ, पिलवली, तोंडली व अबिटगाव या गावांतील ग्रामस्थांनी एकदिलाने प्रशासनाकडे पाठपुरावा केला होता. अधिकाऱ्यांच्या मंगळवारच्या पाहणी दौऱ्यामुळे पुलाच्या तांत्रिक मंजुरीच्या प्रक्रियेला गती मिळण्याची चिन्हे असून, २९ वर्षांची ही प्रदीर्घ मागणी लवकरच प्रत्यक्षात उतरेल आणि संपूर्ण परिसराचा कायापालट होईल, असा विश्वास व्यक्त होत आहे.
