गुहागर : तालुक्यातील परचुरी येथील श्री. भैरी वाघजाई ग्रामदेवता मंदिरातून अज्ञात चोरट्यांनी तब्बल ३२ हजार रुपये किमतीचे दोन अॅम्प्लिफायर मशीन चोरून नेल्याची घटना २६ सप्टेंबर रोजी रात्री घडली. या प्रकरणी गुहागर पोलीस ठाण्यात अज्ञात आरोपीविरुद्ध चोरीचा गुन्हा दाखल करण्यात आला आहे.
पोलिसांनी दिलेल्या माहितीनुसार, २६ सप्टेंबर २०२६ रोजी रात्री ९.०५ ते ९.३० वाजण्याच्या दरम्यान परचुरी, भुवडवाडी येथील रहिवासी रामचंद्र आडविलकर (वय ५१, व्यवसाय शेती) यांच्या गावातील श्री. भैरी वाघजाई ग्रामदेवता मंदिरात ही चोरी झाली. अज्ञात चोरट्यांनी मंदिरातून काळ्या रंगाची अहुजा कंपनीची दोन अॅम्प्लिफायर मशीन चोरून नेली. या दोन्ही मशीनची एकूण किंमत सुमारे ३२ हजार रुपये असल्याचे फिर्यादीत नमूद करण्यात आले आहे.
या घटनेची माहिती मिळाल्यानंतर रामचंद्र आडविलकर यांनी गुहागर पोलीस ठाण्यात फिर्याद दाखल केली. त्यानुसार २७ सप्टेंबर रोजी रात्री ७.५९ वाजता गुन्हा रजिस्टर क्रमांक ९८/२०२६ अन्वये भारतीय न्यायसंहिता अधिनियम २०२३ मधील कलम ३०५ (अ) अन्वये गुन्हा दाखल करण्यात आला आहे. चोरी करणाऱ्या अज्ञात व्यक्तीचा शोध घेण्याचे काम गुहागर पोलिसांकडून सुरू असून, मंदिर परिसरातील परिस्थिती आणि उपलब्ध माहितीच्या आधारे तपास करण्यात येत आहे.
