मुंबई : वाहननिर्मिती क्षेत्रातील आघाडीची कंपनी टोयोटा किर्लोस्कर मोटरने भारतीय बाजारपेठेत आपल्या लोकप्रिय इनोव्हा क्रिस्टाचा ‘लिमो’ एडिशन सादर केला आहे.
वाहन भाडेतत्त्वावर चालवणारे व्यावसायिक आणि प्रवासी वाहतूक क्षेत्रातील ग्राहकांना डोळ्यासमोर ठेवून हे विशेष एडिशन तयार करण्यात आला आहे. हा प्रकार केवळ जीएक्स-एसएलएफ श्रेणीत उपलब्ध असून, त्यामध्ये २.४ लिटर क्षमतेचे डिझेल इंजिन आणि आरामदायी कॅप्टन सीट्स देण्यात आल्या आहेत.
इनोव्हा क्रिस्टाच्या या विशेष प्रकारामध्ये इंजिन किंवा तांत्रिक रचनेत कोणताही बदल करण्यात आलेला नाही. यामध्ये पूर्वीप्रमाणेच २.४ लिटर क्षमतेचे डिझेल इंजिन देण्यात आले आहे. लांब पल्ल्याचा प्रवास करणाऱ्या प्रवाशांना अधिक आराम, प्रशस्त जागा आणि उत्तम प्रवासाचा अनुभव मिळावा, हा या प्रकारामागील मुख्य उद्देश आहे. कंपनीने विशेषतः कॅप्टन सीट्स आणि वाहनाच्या आरामदायी प्रवासक्षमतेवर भर दिला आहे.
किंमतीबाबत बोलायचे झाल्यास, इनोव्हा क्रिस्टाच्या जीएक्स फ्लीट सात आसनी प्रकाराची किंमत १९.९५ लाख रुपये, तर आठ आसनी प्रकाराची किंमत १९.९९ लाख रुपये निश्चित करण्यात आली आहे. या दोन्ही किंमती मुंबईसह देशभरातील शोरूममधील प्रारंभिक किंमती आहेत. विशेष म्हणजे, लिमो हा पूर्णपणे नवीन वाहनप्रकार किंवा तांत्रिक सुधारणा असलेले प्रारूप नसून, आधीपासून विक्रीस उपलब्ध असलेल्या फ्लीट प्रकाराला दिलेले नवे नाव आहे.
या वाहनामध्ये प्रशस्त केबिन, गरजेनुसार बदलता येणारी आसनव्यवस्था, सर्व आसनांच्या रांगांमध्ये वातानुकूलन यंत्रणा, डोक्याला आणि पायांना पुरेशी जागा अशा सुविधा देण्यात आल्या आहेत. याशिवाय स्मार्टफोन जोडणीची सुविधा असलेली स्पर्शपडदा मनोरंजन यंत्रणा आणि स्टिअरिंगवरील नियंत्रणेही देण्यात आली आहेत.
सुरक्षेच्या दृष्टीने या वाहनात सात एअरबॅग, एबीएस, वाहन स्थिरता नियंत्रण यंत्रणा, चढावावर वाहन मागे जाण्यापासून रोखणारी यंत्रणा, इलेक्ट्रॉनिक ब्रेक फोर्स वितरण आणि ब्रेक असिस्ट यांसारख्या सुविधा देण्यात आल्या आहेत. प्रमाणित माहितीनुसार, इनोव्हा क्रिस्टाची इंधन कार्यक्षमता प्रतिलिटर १५ किलोमीटरपर्यंत आहे. या वाहनात मॅन्युअल गिअरबॉक्स देण्यात आला आहे.
या सादरीकरणाबाबत टोयोटा किर्लोस्कर मोटरचे विक्री, सेवा आणि वापरलेल्या वाहन व्यवसायाचे कार्यकारी उपाध्यक्ष सबरी मनोहर म्हणाले की, दोन दशकांहून अधिक काळापासून इनोव्हाने विश्वास, आराम आणि दर्जेदार प्रवासाच्या जोरावर ग्राहकांचा विश्वास संपादन केला आहे. व्यावसायिक प्रवासी वाहतूक क्षेत्रातील ग्राहकांसाठीही इनोव्हा क्रिस्टा लिमोच्या माध्यमातून ही परंपरा नव्या ओळखीसह पुढे नेण्याचा कंपनीचा प्रयत्न आहे.
