मुंबई: महाराष्ट्रातील तरुण नवोन्मेषक, विद्यार्थी आणि ग्रामीण भागातील स्टार्टअप्सना हक्काचे व्यासपीठ मिळवून देण्याच्या उद्देशाने ‘सेवा फर्स्ट इनोव्हेशन चॅलेंज’ स्पर्धेत सहभाग वाढविण्यासाठी आज मंत्रालयात महत्त्वपूर्ण सामंजस्य करार करण्यात आला. कौशल्य, रोजगार, उद्योजकता व नाविन्यता विभागांतर्गत कार्यरत रतन टाटा महाराष्ट्र राज्य कौशल्य विद्यापीठ आणि महाराष्ट्र चेंबर ऑफ कॉमर्स इंडस्ट्री अँड ॲग्रीकल्चरच्या (MACCIA) ‘गाव तिथे उद्योजक इनक्यूबेशन कौन्सिल’ (GTUIC) यांच्यात हा द्विपक्षीय करार संपन्न झाला. कौशल्य, रोजगार, उद्योजकता व नाविन्यता मंत्री मंगलप्रभात लोढा यांच्या प्रमुख उपस्थितीत पार पडलेल्या या करारावर विभागाच्या अपर मुख्य सचिव मनिषा वर्मा, विद्यापीठाच्या कुलगुरू डॉ. अपूर्वा पालकर आणि कौन्सिलचे अध्यक्ष रविंद्र माणगावे यांनी स्वाक्षऱ्या केल्या.
याप्रसंगी मार्गदर्शन करताना मंत्री मंगलप्रभात लोढा म्हणाले की, प्रधानमंत्री नरेंद्र मोदी यांच्या नेतृत्वात तसेच मुख्यमंत्री देवेंद्र फडणवीस, उपमुख्यमंत्री एकनाथ शिंदे व उपमुख्यमंत्री सुनेत्रा पवार यांच्या मार्गदर्शनाखाली राज्यातील तळागाळातील नवकल्पनांना प्रोत्साहन देणे आणि सामाजिक समस्यांवर तंत्रज्ञान-आधारित प्रभावी उपाय शोधणे हा या उपक्रमाचा मुख्य हेतू आहे. ग्रामीण व निम-शहरी भागातील गुणवान तरुणांच्या कल्पकतेला व्यावसायिक रूप देऊन राज्यातील महाविद्यालये, विद्यापीठे, आयटीआय आणि पॉलिटेक्निकच्या विद्यार्थ्यांना उद्योग जगताशी जोडले जाईल. निवडक नवकल्पनांना तज्ज्ञांमार्फत तांत्रिक साहाय्य, मार्गदर्शन आणि व्यासपीठ उपलब्ध करून देत तरुणांना केवळ नोकरी शोधणारे न ठेवता सक्षम उद्योजक घडविण्यावर शासनाचा भर असल्याचे सांगत या भागीदारीमुळे राज्याच्या उद्योजकता परिसंस्थेला मोठी बळकटी मिळेल, असा विश्वास त्यांनी व्यक्त केला.
यावेळी गाव तिथे उद्योजक इनक्यूबेशन कौन्सिलचे अध्यक्ष रविंद्र माणगावे यांनी भूमिका मांडताना स्पष्ट केले की, ग्रामीण भागातील युवक, महिला आणि कारागिरांकडे क्षमता असूनही भांडवल, तंत्रज्ञान, बाजारपेठ आणि योग्य मार्गदर्शनाचा अभाव असतो; ही दरी दूर करून रोजगार मागणाऱ्यांऐवजी रोजगार निर्माण करणारी सक्षम पिढी घडविण्यासाठी संस्था राज्यातील ३६ जिल्ह्यांमध्ये काम करत आहे. या स्पर्धेसाठी संस्थेचे पूर्ण सहकार्य राहील, असे त्यांनी नमूद केले. या कार्यक्रमाला आशिष पेडणेकर, करुणाकर शेट्टी, शिवाजी मानकर, शिखर जैन, रामेश्वर पवार, सुरेश घोरपडे, अण्णासाहेब पाटील, दिवाकर केसकर, ॲड. रिचा पाठक, अक्षता भांबळे, विशाल बंडगर, जितु चव्हाण यांच्यासह संबंधित अधिकारी व मान्यवर उपस्थित होते.
