महाड/रायगड : मुंबई-गोवा राष्ट्रीय महामार्गावरून ट्रकमधून छुप्या मार्गाने केली जाणारी गोवा बनावटीच्या दारूची कोट्यवधी रुपयांची आंतरराज्य तस्करी राज्य उत्पादन शुल्क विभागाच्या सतर्क पथकाने महाडजवळ उघडकीस आणली आहे. केंबुर्ली गावच्या हद्दीत मध्यरात्री रचलेल्या सापळ्यात सुमारे १ कोटी ५० लाख रुपये किमतीचा ‘रॉयल ब्लू व्हिस्की’ या मद्याचा भलामोठा साठा जप्त करण्यात आला असून, दारू वाहतुकीसाठी वापरण्यात आलेला ट्रक ताब्यात घेत चालकाला जागेवरच अटक करण्यात आली आहे.
मिळालेल्या माहितीनुसार, गोव्याहून मुंबईच्या दिशेने निघालेल्या एका संशयित ट्रकमधून मोठ्या प्रमाणावर बेकायदेशीर विदेशी मद्याची तस्करी होणार असल्याची खात्रीशीर गुप्त माहिती राज्य उत्पादन शुल्क विभागाला मिळाली होती. या माहितीच्या आधारे अधिकाऱ्यांच्या पथकाने महाड तालुक्यातील केंबुर्ली गावच्या हद्दीत महामार्गावर चोख नाकेबंदी करत सापळा लावला. मिळालेल्या वर्णनाचा ट्रक महाड परिसरात येताच पथकाने त्याला अडवून चौकशी केली असता, सुरुवातीला चालकाने पोलिसांना उडवाउडवीची आणि दिशाभूल करणारी उत्तरे देण्याचा प्रयत्न केला. मात्र, पथकाने संशय बळावल्याने ट्रकची कसून तपासणी केली असता, त्यात शिताफीने लपवून ठेवलेले गोवा बनावटीच्या दारूचे शेकडो बॉक्स पाहून अधिकाऱ्यांचे डोळे पांढरे झाले.
या कारवाईदरम्यान उत्पादन शुल्क विभागाने सुमारे दीड कोटी रुपयांचे ‘रॉयल ब्लू व्हिस्की’चे बॉक्स आणि तस्करीसाठी वापरलेला ट्रक असा एकूण मुद्देमाल हस्तगत केला आहे. घटनास्थळावरून ताब्यात घेण्यात आलेल्या ट्रकचालकाची कसून चौकशी सुरू असून, गोव्यातून निघालेला हा मद्यसाठा मुंबईत नेमका कोणाला पोहोचवला जाणार होता आणि या मोठ्या आंतरराज्य रॅकेटमागे नेमके कोण सूत्रधार आहेत, याचा सखोल तपास अधिकारी करत आहेत. भर महामार्गावर केलेल्या या धाडसी कारवाईमुळे रायगडसह कोकणातील दारू तस्कर व माफियांमध्ये प्रचंड खळबळ उडाली आहे.
