माणगाव : माणगाव-पुणे मार्गावरील अत्यंत वर्दळीच्या आणि नागमोडी वळणांच्या ताम्हिणी घाटात रविवारी सकाळी दुचाकीचा भीषण अपघात घडला. या दुर्दैवी घटनेत दुचाकीवर पाठीमागे बसलेल्या एका २७ वर्षीय तरुणीचा जागीच मृत्यू झाला असून, दुचाकी चालवणारा तरुण गंभीर जखमी झाला आहे. या अपघातामुळे हळहळ व्यक्त होत असून संबंधित कुटुंबावर दुःखाचा डोंगर कोसळला आहे.
माणगाव पोलिसांनी दिलेल्या माहितीनुसार, मंजीत संजय शर्मा (वय ३२) आणि पूजा मनोज गोरे (वय २७) हे दोघे दुचाकीवरून पुण्याहून माणगावच्या दिशेने प्रवास करत होते. रविवारी, १ नोव्हेंबर रोजी सकाळी दहा वाजेच्या सुमारास ताम्हिणी घाटातील रस्त्यावर त्यांच्या दुचाकीला अचानक भीषण अपघात झाला. हा अपघात इतका जोरदार होता की पूजा गोरे या गंभीर जखमी होऊन त्यांचा घटनास्थळीच मृत्यू झाला, तर दुचाकीस्वार मंजीत शर्मा जखमी झाले. अपघाताची माहिती मिळताच माणगाव पोलीस ठाण्याच्या पथकाने तात्काळ घटनास्थळी धाव घेऊन मदतकार्य राबवले आणि परिस्थिती नियंत्रणात आणली. या अपघाताचे नेमके कारण अद्याप समोर आले नसून, माणगाव पोलीस या प्रकरणाचा सखोल तपास करत आहेत.
