रायगड : मुंबई-गोवा महामार्गावर माणगावजवळ हॉटेल आनंद भुवनसमोर कार आणि दुचाकी यांच्यात झालेल्या अपघातात शिवसेनेचे दिघी तालुका संपर्कप्रमुख जनार्दन गोवारी यांचा जागीच मृत्यू झाला.
मुंबईच्या दिशेने जाणाऱ्या मार्गावर हा अपघात घडला. या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, कार आणि दुचाकी एकाच दिशेने जात असताना हॉटेल आनंद भुवनसमोर दुचाकीस्वाराने उजवीकडे वळण्याचा प्रयत्न केला. त्याचवेळी मागून येणाऱ्या कारची दुचाकीला जोरदार धडक बसली. या धडकेत जनार्दन गोवारी यांचा गंभीर अपघात होऊन जागीच मृत्यू झाला.या अपघाताची घटना महामार्गालगत लावण्यात आलेल्या सीसीटीव्ही कॅमेऱ्यात कैद झाली आहे. अपघाताची माहिती मिळताच पोलिसांनी घटनास्थळी धाव घेतली. या प्रकरणी पोलिसांकडून पुढील तपास सुरू आहे.जनार्दन गोवारी यांच्या निधनामुळे शिवसेनेच्या कार्यकर्त्यांमध्ये शोक व्यक्त केला जात आहे.
