मुंबई : राज्यातील महामार्गांवर घडणाऱ्या भीषण रस्ते अपघातांत गंभीर जखमी होणाऱ्या प्रवाशांचे प्राण वाचवण्यासाठी आणि त्यांना अतिमहत्त्वाच्या ‘गोल्डन अवर’मध्ये तत्काळ वैद्यकीय उपचार मिळवून देण्यासाठी राज्य शासन लवकरच ‘हवाई रुग्णवाहिका’ सेवा सुरू करणार आहे. अपघातानंतरचा पहिला तास म्हणजेच गोल्डन अवर हा जखमींच्या जीवनमरणाच्या दृष्टीने अत्यंत निर्णायक ठरतो, त्यामुळे या वेळेत रुग्णांना विनाविलंब अद्ययावत ट्रॉमा केअर सेंटरपर्यंत पोहोचवण्यासाठी हवाई रुग्णवाहिका ही प्रभावी ठरेल, असा विश्वास परिवहन मंत्री प्रताप सरनाईक यांनी व्यक्त केला असून नवीन वर्षाच्या सुरुवातीला ही जीवनदायी सेवा प्रत्यक्ष सुरू करण्याचे राज्य शासनाचे नियोजन आहे.
या महत्त्वाकांक्षी प्रकल्पाच्या अंमलबजावणीसाठी १५ नोव्हेंबरपर्यंत प्रमाणित कार्यपद्धती निश्चित करून मंजुरी घेतली जाणार आहे. त्यानंतर नोव्हेंबरअखेर उच्चाधिकार समितीची अंतिम मंजुरी मिळवून निविदा प्रक्रिया राबवली जाईल. राज्यात दरवर्षी साधारणपणे १५ हजार रस्ते अपघात घडतात, ज्यामध्ये वाहतूक कोंडी आणि दूरवर असणारी रुग्णालये यामुळे जखमींना वेळेवर उपचार मिळणे मोठे आव्हान ठरत होते. हे आव्हान मोडीत काढण्यासाठी पहिल्या टप्प्यात मुंबई-गोवा महामार्ग, मुंबई-पुणे द्रुतगती महामार्ग आणि समृद्धी महामार्ग या अतिसंवेदनशील मार्गांवर ही यंत्रणा सज्ज केली जाणार आहे.
ही अत्याधुनिक सेवा अखंडपणे सुरू ठेवण्यासाठी परिवहन विभाग, आरोग्य विभाग आणि पोलीस यंत्रणेत चोख समन्वय साधला जाणार आहे. याअंतर्गत सक्षम ट्रॉमा केअर सेंटरचे जाळे, सेवा पुरवठादारांचे पॅनेल, रस्ता सुरक्षा निधीतून आर्थिक तरतूद आणि आपत्कालीन प्रतिसाद व्यवस्था उभारण्यावर भर देण्यात आला आहे. अपघातातील प्रत्येक जीव अत्यंत अनमोल असून केवळ उपचारांना होणाऱ्या विलंबामुळे कोणाचाही मृत्यू होऊ नये यासाठी आधुनिक तंत्रज्ञानाची जोड देऊन रस्ते अपघातातील मृत्यूदर रोखण्यासाठी शासन कटिबद्ध असल्याची भूमिका या वेळी स्पष्ट करण्यात आली.
