देवगड : तारामुंबरी आणि कुणकेश्वरच्या सागरी पट्ट्यात महाराष्ट्र सागरी मासेमारी अधिनियम, १९८१ चे सर्रास उल्लंघन करत बेकायदेशीर मासेमारी करणाऱ्यांवर मत्स्यव्यवसाय विभागाने आपला कारवाईचा बडगा अधिक तीव्र केला आहे. सोमवारी सकाळी दहा ते अकराच्या सुमारास समुद्रात गस्त घालत असताना अधिकाऱ्यांनी रत्नागिरी येथील ‘इब्राहिम युसूफ’ (IND-MH-४-MM-५६३५) ही पर्ससीन नौका प्रत्यक्ष जागीच पकडून जप्त केली. याच दरम्यान देवगड येथील ‘हरिकृपा-१’ (IND-MH-५-MM-३९०२) या मिनी पर्ससीन नौकेने गस्ती नौकेची चाहूल लागताच घटनास्थळावरून धूम ठोकली. विभागाची ही लागोपाठ तिसरी मोठी कारवाई ठरल्याने किनारपट्टीवरील पारंपरिक मच्छीमारांमध्ये समाधानाचे वातावरण पसरले आहे.
सिंधुदुर्गच्या मत्स्यव्यवसाय सहाय्यक आयुक्तांच्या मार्गदर्शनाखाली देवगडचे परवाना तथा अंमलबजावणी अधिकारी किरण वाघमारे यांनी सुरक्षा रक्षकांच्या पथकासह ही धडक मोहीम राबवली. तारामुंबरी आणि कुणकेश्वरच्या समोर अवघ्या ३ ते ४ वाव उथळ पाण्यात अवैध पर्ससीन मासेमारी सुरू असल्याची खात्रीशीर माहिती पथकाला मिळाली होती. त्यानुसार छापा टाकून ताब्यात घेतलेल्या ‘इब्राहिम युसूफ’ नौकेची तपासणी केली असता, त्यावर तब्बल २० परप्रांतीय खलाशी कार्यरत असल्याचे निष्पन्न झाले. वास्तविक पाहता या नौकेकडे कायद्यानुसार १२ सागरी मैलांच्या पलीकडे मासेमारी करण्यासाठी एक्सेस पास उपलब्ध असतानाही, नियम धाब्यावर बसवून किनाऱ्यालगतच मासेमारी केली जात होती. पकडण्यात आलेली ही नौका देवगड बंदरात आणण्यात आली असून दोषींवर अधिनियमातील तरतुदींनुसार तात्काळ कठोर कायदेशीर कारवाईची प्रक्रिया हाती घेण्यात आली आहे; तसेच पळून गेलेल्या ‘हरिकृपा-१’ या नौकेवरही कायदेशीर कारवाई प्रस्तावित करण्यात आल्याचे अधिकाऱ्यांनी स्पष्ट केले.
स्थानिक पारंपरिक रांपण संघाने यापूर्वीच परवाना अधिकाऱ्यांची भेट घेऊन किनाऱ्यालगत होणाऱ्या अवैध पर्ससीन मासेमारीला आळा घालण्याची जोरदार मागणी केली होती. प्रशासनाने ही मागणी गांभीर्याने घेत गस्त वाढवल्यामुळे बेकायदा मासेमारी करणाऱ्यांचे धाबे दणाणले आहेत. या धडक मोहिमेचे पारंपरिक मच्छीमार बांधवांकडून उत्स्फूर्त स्वागत करण्यात आले असून सागरी संसाधनांच्या संवर्धनासाठी आणि पारंपरिक मच्छीमारांच्या हक्कांच्या रक्षणासाठी समुद्रातील नियमित गस्त अशीच अविरत सुरू ठेवण्याचा निर्धार मत्स्यव्यवसाय विभागाने व्यक्त केला आहे.
