छत्रपती संभाजीनगर : माहेरहून अवघे दोन तोळे सोने आणण्याच्या क्षुल्लक मागणीसाठी गरोदरपणातही अमानुष शारीरिक व मानसिक छळ करत, प्रसूतीचा खर्च टाळण्यासाठी वैद्यकीय उपचार नाकारल्याने एका ९ महिन्यांच्या गर्भवती मातेचा आणि तिच्या पोटातील निष्पाप बाळाचा उपचाराअभावी अत्यंत करुण अंत झाल्याची मन हेलावून टाकणारी घटना उघडकीस आली आहे. पैठण तालुक्यातील विहामांडवा येथील समीक्षा उर्फ स्वाती विशाल निंबाळकर (वय २६) असे मृत महिलेचे नाव असून, तिच्या मृत्यूनंतर संतप्त भावना व्यक्त होत आहेत. याप्रकरणी पाचोड पोलीस ठाण्यात पती, सासू, सासरे आणि नणंद अशा चौघांविरुद्ध गंभीर स्वरूपाचा गुन्हा दाखल करण्यात आला आहे.
स्वाती गरोदर असताना ६ सप्टेंबर रोजी प्रकृती खालावल्यामुळे तिला एका खासगी रुग्णालयात तपासणीसाठी नेण्यात आले होते. तपासणीदरम्यान तिच्या पोटातील पाण्याचे प्रमाण धोकादायकरित्या कमी झाल्याचे आणि बाळाच्या गळ्याभोवती नाळ वेढली गेल्याचे निष्पन्न झाले होते. परिस्थितीचे गांभीर्य ओळखून डॉक्टरांनी स्वाती व बाळाचा जीव वाचवण्यासाठी तातडीने सिझेरियन शस्त्रक्रिया करण्याचा सल्ला दिला होता. मात्र, पैशांच्या लोभापायी सासरच्या मंडळींनी उपचाराचा खर्च करण्यास स्पष्ट नकार देत क्रौर्याची परिसीमा गाठली. गरोदर असतानाही वेळेवर वैद्यकीय उपचार न मिळवून देता संगनमताने हेतूपुरस्सर निष्काळजीपणा केला गेला, ज्यामुळे स्वातीची प्रकृती दिवसेंदिवस खालावत जाऊन अत्यंत चिंताजनक बनली.
अखेर परिस्थिती हाताबाहेर गेल्यानंतर २५ सप्टेंबर रोजी रात्री ११:१० वाजेच्या सुमारास तिला अत्यंत गंभीर अवस्थेत छत्रपती संभाजीनगर येथील घाटी रुग्णालयात दाखल करण्यात आले. मात्र, क्रूर सासरच्यांच्या हलगर्जीपणामुळे तोपर्यंत बराच उशीर झाला होता; घाटी रुग्णालयात प्रत्यक्ष उपचार सुरू होण्यापूर्वीच स्वाती आणि तिच्या गर्भातील निष्पाप जिवाची प्राणज्योत मालवली. या हृदयद्रावक घटनेनंतर स्वातीचे वडील सदाशिव शंकर देशमुख (वय ४९, रा. राहेरी, ता. सिंदखेडराजा, जि. बुलढाणा) यांनी पाचोड पोलिसांत धाव घेऊन तक्रार नोंदवली. त्यांच्या फिर्यादीवरून २९ सप्टेंबर रोजी सायंकाळी पावणेसात वाजेच्या सुमारास पती विशाल अनिल निंबाळकर, सासरे अनिल रंगनाथ निंबाळकर, सासू शारदा अनिल निंबाळकर (सर्व रा. विहामांडवा, ता. पैठण) आणि नणंद ऐश्वर्या यांच्याविरुद्ध भारतीय न्याय संहिता (BNS) २०२३ च्या विविध कलमांन्वये गुन्हा नोंदवण्यात आला असून पोलीस या अमानुष प्रकरणाचा पुढील तपास करत आहेत.
