पुणे : शिक्षणाचे माहेरघर असलेल्या पुण्यात पुन्हा एकदा हुंडाबळीची मन हेलावून टाकणारी घटना समोर आली असून, चारचाकी गाडीसाठी माहेरहून पाच लाख रुपये आणण्याच्या मागणीवरून झालेल्या छळाला कंटाळून २३ वर्षीय आयटी अभियंता विवाहितेने गळफास घेऊन आपले जीवन संपवले. वैष्णवी प्रवीण जरांडे (वय २३) असे मृत तरुणीचे नाव असून, या धक्कादायक प्रकरणी काळेपडळ पोलिसांनी तत्पर कारवाई करत तिचा पती ओंकार संजय घिसरे याच्यासह सासू आणि सासऱ्याला बेड्या ठोकल्या आहेत. वैष्णवीच्या आईने दिलेल्या तक्रारीवरून सासरच्या तिघांविरुद्ध हुंड्यासाठी मानसिक व शारीरिक छळ करून आत्महत्येस प्रवृत्त केल्याप्रकरणी गंभीर गुन्हा नोंदवण्यात आला आहे.
मिळालेल्या माहितीनुसार, वैष्णवीचा विवाह ९ मे २०२६ रोजी उंड्री परिसरातील वडाचीवाडी येथील ओंकार घिसरे याच्याशी मोठ्या थाटामाटात झाला होता. मुलीच्या सुखासाठी माहेरच्या कुटुंबीयांनी लग्नात तब्बल ४० ते ४५ लाख रुपयांचा खर्च केला होता, तसेच १० तोळे सोने आणि जावयाच्या मागणीनुसार दुचाकीही घेऊन दिली होती. बंगळुरू येथील एका नामांकित आयटी कंपनीत कार्यरत असलेली वैष्णवी लग्नानंतर अवघे २३ दिवस सासरी राहून नोकरीनिमित्त बंगळुरूला गेली होती. त्यानंतर जून अखेरीस ती पुन्हा पुण्यात सासरी परतली आणि वर्क फ्रॉम होम पद्धतीने घरातूनच काम करू लागली. मात्र सासरच्या मंडळींची हाव एवढ्यावरच संपली नव्हती. पती ओंकारने १० जून रोजी वैष्णवीच्या वडिलांना फोन करून चारचाकी कार खरेदीसाठी ५ लाख रुपयांची रोकड किंवा नवी गाडी घेऊन देण्याची मागणी केली. लग्नात आधीच मोठा खर्च झाल्याने वडिलांनी पैसे देण्यास असमर्थता दर्शवली; यानंतर माहेरहून पैसे उकळण्यासाठी वैष्णवीचा अमानुष छळ सुरू झाला. फिर्यादीनुसार वैष्णवी गर्भवती असतानाही तिचा छळ थांबला नाही; तिला सकाळी साडेसात ते रात्री आठ अशी हिंजवडीतील कंपनीत जाऊन येऊन नोकरी सांभाळत सासरची सर्व कामे करावी लागत होती.
दरम्यान, २४ सप्टेंबर रोजी रात्री वैष्णवीने तिच्या आईला फोन करून सासरी होत असलेल्या असह्य त्रासाची माहिती दिली होती. त्यानंतर त्याच रात्री सुमारे साडेअकरा वाजता पती ओंकारने तिच्या माहेरी फोन लावून, “तुमच्या मुलीला घरी घेऊन जा, नाहीतर माझ्याकडून काहीतरी बरेवाईट होईल,” अशी थेट धमकी दिली. या धमकीनंतर अवघ्या काही तासांतच, २५ सप्टेंबरच्या पहाटे वैष्णवीची प्रकृती गंभीर असल्याचा निरोप माहेरच्यांना देण्यात आला. आई-वडील तातडीने उंड्री येथील सासरी पोहोचले असता, वैष्णवीचा मृतदेह जमिनीवर गोधडीने झाकलेल्या संशयास्पद अवस्थेत आढळून आला. तिने पंख्याला गळफास घेतल्याचा दावा सासरच्यांनी केला असला, तरी या मृत्यूमागील घटनाक्रमावर माहेरच्यांनी गंभीर संशय व्यक्त केला आहे. काही महिन्यांपूर्वी गाजलेल्या वैष्णवी हगवणे प्रकरणानंतर आता उंड्रीतील या घटनेमुळे पुण्यात वाढत्या हुंडाबळीच्या घटनांवरून नागरिकांमधून प्रचंड संताप व्यक्त होत असून, काळेपडळ पोलीस या गुन्ह्याचा सखोल तपास करत आहेत.
