मुंबई: राज्य शासनाच्या अत्यंत लोकप्रिय ठरलेल्या ‘लेक लाडकी’ योजनेच्या अर्ज प्रक्रियेत आणि नियमांत व्यापक बदल करण्यात आले असून, आता लाभार्थ्यांना महाडीबीटी २.० पोर्टलद्वारे थेट ऑनलाइन अर्ज भरण्याची सुविधा उपलब्ध करून देण्यात आली आहे. महिला व बालविकास मंत्री आदिती तटकरे यांनी या निर्णयाची घोषणा केली. कागदपत्रांची संख्या कमी करून नोंदणीपासून अर्जाची सद्यस्थिती तपासण्यापर्यंतची संपूर्ण यंत्रणा डिजिटल करण्यात आल्याने राज्यातील महिला व कुटुंबियांना मोठा दिलासा मिळाला आहे.
यापूर्वीच्या नियमांनुसार अर्जदारांना संबंधित गावातील अंगणवाडी केंद्रात स्वतः जाऊन प्रत्यक्ष अर्ज सादर करणे बंधनकारक होते. त्यानंतर ते अर्ज प्रकल्प स्तरावर गोळा करून तत्कालीन संकेतस्थळावर नोंदवले जात आणि पुढील छाननी व मंजुरीची कार्यवाही केली जात असे. मात्र, शासनाच्या विविध योजनांमध्ये सुलभता आणि सुसूत्रीकरण आणण्याच्या उद्देशाने नवीन शासन प्रक्रिया पुनर्रचना (जीपीआर) तयार करण्यात आली आहे. या सुधारणेमुळे अर्ज नोंदणी, छाननी, मंजुरी आणि प्रत्यक्ष लाभ वितरण अशा सर्वच टप्प्यांमध्ये गती येणार आहे. विशेष म्हणजे, ज्या भागात अद्याप अंगणवाडी केंद्रे कार्यान्वित नाहीत, अशा भागांतील गरजू नागरिकांनाही आता कोणत्याही अडचणीविना थेट घरबसल्या ऑनलाइन अर्ज करता येईल.
लेक लाडकी योजनेअंतर्गत आतापर्यंत २ लाख ९८ हजार ६९५ लाभार्थ्यांना पहिला हप्ता वितरित करण्यात आला आहे. योजनेचा आर्थिक लाभ थेट लाभ हस्तांतरण (डीबीटी) पद्धतीने थेट बँक खात्यात वर्ग करण्याचा निर्णय शासनाने आधीच घेतला होता. आता संपूर्ण अर्ज प्रक्रिया ऑनलाइन केल्याने आणि आवश्यक कागदपत्रांची अट शिथिल केल्याने योजनेच्या पारदर्शक अंमलबजावणीतील अत्यंत महत्त्वाचा टप्पा पूर्ण झाला असल्याचे मंत्री तटकरे यांनी स्पष्ट केले आहे. राज्यातील कोणत्याही भागातील रहिवासी आता आपल्या मोबाईल किंवा संगणकावरून अर्जाचा मागोवा घेऊ शकणार आहेत.
