राजापूर: घरातील काम करत असताना ग्राइंडरचे ब्लेड अचानक तुटून थेट चेहऱ्यावर आदळल्यामुळे ‘महा कोकण’चे यूट्यूबर जगन्नाथ धोंडू गुरव हे गंभीर जखमी झाल्याची धक्कादायक घटना घडली आहे. ही दुर्घटना आज सकाळी साडेअकरा वाजण्याच्या सुमारास राजापूर शहरातील गुरववाडी येथे घडली.
घरी काम सुरू असताना अचानक ग्राइंडरचे ब्लेड फुटले आणि अतिशय वेगाने उडून जगन्नाथ गुरव यांच्या चेहऱ्यावर जाऊन आदळले. या भीषण अपघातात त्यांच्या जबाड्याला गंभीर दुखापत झाली असून, ब्लेड जबडा फाडून मेंदीपर्यंत पोहोचल्याची प्राथमिक माहिती समोर आली आहे.
दुर्घटनेनंतर त्यांना तातडीने राजापूर शहरातील एका खासगी रुग्णालयात उपचारासाठी दाखल करण्यात आले. तेथे प्राथमिक उपचार केल्यानंतर प्रकृती गंभीर असल्याने अधिक उपचारासाठी त्यांना कोल्हापूर जिल्हा रुग्णालयात हलवण्यात आले.
घटनेची माहिती मिळताच अपूर्वा किरण सामंत फाऊंडेशन अॅम्बुलन्स सर्व्हिसेसचे चालक तौफिक सय्यद यांनी तातडीने घटनास्थळी धाव घेतली. युट्यूबर जगन्नाथ गुरव यांची प्रकृती लक्षात घेता त्यांनी अजिबात वेळ न घालवता त्यांना पुढील उपचारासाठी कोल्हापूर येथे नेले. या दुर्घटनेमुळे परिसरात एकच खळबळ उडाली असून, त्यांच्या प्रकृतीबाबत पुढील माहितीची प्रतीक्षा आहे.
