तुषार पाचलकर / राजापूर : तालुक्यातील कारवली गावच्या महात्मा गांधी तंटामुक्ती समितीच्या अध्यक्षपदी माजी सरपंच श्री. गणेश कृष्णा वरेकर यांची सर्वानुमते बिनविरोध निवड करण्यात आली आहे. २९ सप्टेंबर रोजी आयोजित करण्यात आलेल्या विशेष ग्रामसभेत हा महत्त्वपूर्ण निर्णय घेण्यात आला.
कारवली येथील ही ग्रामसभा नवनियुक्त प्रशासक श्री. विश्वनाथ डवरी यांच्या अध्यक्षतेखाली खेळीमेळीच्या वातावरणात पार पडली. सभेच्या सुरुवातीला गावातील विविध विषयांवर चर्चा झाल्यानंतर तंटामुक्ती समिती अध्यक्षपदाची निवड प्रक्रिया सुरू करण्यात आली. यावेळी अध्यक्षपदासाठी श्री. नारायण पांचाळ यांनी गणेश वरेकर यांच्या नावाची सूचना मांडली, तर सौ. स्मिता उदय साळवी यांनी या सूचनेला अनुमोदन दिले. अन्य कोणताही अर्ज न आल्याने संपूर्ण गावाने एकमुखाने पाठिंबा दर्शवत वरेकर यांची अध्यक्षपदी निवड झाल्याचे जाहीर करण्यात आले.
गणेश वरेकर यांनी यापूर्वीही कारवली गावचे सरपंचपद आणि तंटामुक्ती समितीचे अध्यक्षपद अत्यंत यशस्वीरीत्या सांभाळले आहे. सामाजिक कार्यातील सातत्य, ग्रामस्थांच्या सुख-दुःखात धावून जाण्याची वृत्ती आणि सदैव उपलब्ध राहणारा लोकप्रतिनिधी अशी त्यांची परिसरात ख्याती आहे. त्यांच्या या सर्वसमावेशक कार्यामुळेच गावाने पुन्हा एकदा त्यांच्यावर हा विश्वास दाखवला आहे. गावातील शांतता, सलोखा आणि विकासाला गती देण्यासाठी ही निवड महत्त्वाची मानली जात असून, त्यांच्या निवडीबद्दल कारवली गावातून तसेच राजापूर तालुक्यातून त्यांच्यावर अभिनंदनाचा वर्षाव होत आहे.
