दापोली (प्रतिनिधी): तालुक्यातील गिम्हवणे येथे तीन दिवसांपूर्वी मध्यरात्रीच्या सुमारास घडलेल्या दुचाकीच्या भीषण अपघातात गंभीर जखमी झालेल्या १७ वर्षीय दुर्वांक राजेंद्र यादव (रा. दापोली) या अल्पवयीन तरुणाचा बुधवारी, २८ ऑक्टोबर रोजी मुंबईतील रुग्णालयात उपचारादरम्यान दुर्दैवी मृत्यू झाला. गेल्या तीन दिवसांपासून सुरू असलेली त्याची मृत्यूशी झुंज अखेर अपयशी ठरल्याने दापोली परिसरात तीव्र हळहळ व्यक्त होत असून यादव कुटुंबावर दुःखाचा मोठा डोंगर कोसळला आहे. याच अपघातात गंभीर जखमी झालेला त्याचा मित्र संकेत अमर देवळेकर (वय २४, रा. खेड) याच्यावर डेरवण येथील रुग्णालयात सध्या अतिदक्षतेखाली उपचार सुरू आहेत.
रविवार, २५ ऑक्टोबर रोजी मध्यरात्री १२ ते १२.३० वाजण्याच्या सुमारास गिम्हवणे येथील नवीन पेट्रोल पंपासमोरील मारुती मंदिराजवळ हा थरारक अपघात घडला होता. दुर्वांक यादव हा आपल्या ताब्यातील दुचाकी चालवत होता, तर त्याचा मित्र संकेत देवळेकर हा मागे बसला होता; दोघेही मध्यरात्रीच्या वेळी जेवणासाठी दुर्वांकच्या घराच्या दिशेने जात होते. घरापासून अवघ्या काही मिनिटांच्या अंतरावर असतानाच दुचाकीवरील चालकाचे नियंत्रण अचानक सुटले आणि भरधाव दुचाकी रस्त्याच्या कडेला असलेल्या लोखंडी बॅनरवर जाऊन जोराने आदळली. हा अपघात इतका भीषण होता की, गाडीवरील दोघेही रस्त्यावर फेकले जाऊन गंभीर जखमी झाले.
अपघातात दुर्वांकच्या डोक्याला आणि चेहऱ्याला अत्यंत गंभीर मार लागल्याने त्याला तातडीने दापोली उपजिल्हा रुग्णालयात प्राथमिक उपचारासाठी दाखल करण्यात आले होते. मात्र, त्याची प्रकृती चिंताजनक असल्याने डॉक्टरांच्या सल्ल्यानुसार पुढील उपचारासाठी त्याला तात्काळ डेरवण येथील रुग्णालयात हलवण्यात आले. तेथेही प्रकृतीत अपेक्षित सुधारणा न झाल्यामुळे आणि परिस्थिती अधिक नाजूक बनल्याने २६ ऑक्टोबर रोजी त्याला पुढील उपचारांसाठी तातडीने मुंबईला हलवण्यात आले होते; परंतु मुंबईत उपचार सुरू असतानाच बुधवारी त्याची प्राणज्योत मालवली. जेवणासाठी मित्राच्या घराकडे जात असताना आणि घर अगदी हाकेच्या अंतरावर येऊन ठेपले असतानाच काळाने घातल्यामुळे संपूर्ण परिसरात हळहळ व्यक्त होत आहे. दरम्यान, या भीषण अपघाताचे नेमके कारण अद्याप समोर आले नसून, दापोली पोलीस या संपूर्ण प्रकरणाचा पुढील सखोल तपास करत आहेत.
