रत्नागिरी: कोकण रेल्वे मार्गावरील प्रवाशांची वाढती गर्दी आणि मालवाहतुकीचा ताण कमी करण्यासाठी रेल्वे प्रशासनाने दुपदरीकरणाच्या कामाला गती देण्याचा मोठा निर्णय घेतला असून येत्या पाच वर्षांत हे काम पूर्ण केले जाईल, अशी महत्त्वपूर्ण माहिती कोकण रेल्वेचे व्यवस्थापकीय संचालक संतोषकुमार झा यांनी दिली. दुपदरीकरण पूर्ण झाल्यानंतर या मार्गावरून दररोज १०० पेक्षा जास्त प्रवासी व मालवाहू गाड्या धावतील, ज्यामुळे कोकणातील पर्यटनासह स्थानिक अर्थव्यवस्थेला नवी दिशा मिळेल, असा विश्वास त्यांनी पत्रकारांशी बोलताना व्यक्त केला.
सध्या कोकण रेल्वेच्या एकूण ७४१ किलोमीटर मार्गापैकी ९० टक्क्यांहून अधिक मार्ग एकेरी असल्याने गाड्यांना क्रॉसिंगसाठी ताटकळत राहावे लागते. या पार्श्वभूमीवर पहिल्या टप्प्यात २६३ किलोमीटर अंतराचे ‘पॅच डब्लिंग’ (तुकड्या-तुकड्यांचे दुपदरीकरण) हाती घेण्यात येणार आहे. यासाठी सविस्तर प्रकल्प अहवाल तयार करण्याची प्रक्रिया सुरू असून मंगळूर ते गोवा आणि गोवा ते वैभववाडी या टप्प्यांमधील तांत्रिक सर्वेक्षण सध्या वेगाने प्रगतीपथावर आहे. दुपदरीकरणाच्या मार्गातील तांत्रिक अडचणी दूर करण्यासाठी आणि वाहतूक सुरळीत ठेवण्यासाठी नव्या बोगद्यांची निर्मिती केली जाणार आहे. यात प्रामुख्याने पेडणे (गोवा) आणि जुने गोवे येथे नव्या रेल्वे बोगद्यांचे काम हाती घेतले जाईल. या महत्त्वाकांक्षी प्रकल्पासाठी केंद्रीय रेल्वे मंत्रालयाने आवश्यक निधी मंजूर केल्याने कामाला मोठा वेग मिळणार आहे.
नवीन बोगदे आणि आधुनिक ट्रॅकमुळे या मार्गावरील रेल्वे वाहतूक अधिक सुरक्षित तसेच विश्वासार्ह होईल, गाड्यांचा वेग वाढून प्रवासाचा वेळ लक्षणीयरित्या कमी होईल. यामुळे महाराष्ट्र, गोवा आणि कर्नाटक या तिन्ही राज्यांतील लाखो प्रवाशांना मोठा दिलासा मिळणार असून व्यापार, उद्योग आणि पर्यटनाला मोठी चालना मिळेल. दुसरीकडे मालवाहतुकीला बळ देण्यासाठी कोलाड ते सुरतकल दरम्यान चालवल्या जाणाऱ्या ‘रो-रो’ सेवेचाही विस्तार केला जाणार आहे. येत्या ऑक्टोबर महिन्यापासून या रो-रो सेवेच्या फेऱ्या १२ वरून थेट ४६ पर्यंत वाढवण्यात येणार असून एका फेरीत ५७ टन वजनाची अवजड वाहने वाहून नेण्याची क्षमता असेल. दरम्यान, रोखे बाजारातून उभारलेल्या कर्जाचा ३०० कोटी रुपयांचा शेवटचा हप्ता २२ सप्टेंबर रोजी फेडण्यात आला असून कोकण रेल्वे आता पूर्णपणे कर्जमुक्त झाली आहे; तसेच पुढील पाच वर्षांत ३०० कोटींपेक्षा जास्त वार्षिक नफा मिळवण्याचे उद्दिष्ट ठेवण्यात आल्याचेही संतोषकुमार झा यांनी स्पष्ट केले.
