पुणे: धार्मिक प्रवचने आणि आध्यात्मिक मार्गदर्शनाचा बुरखा पांघरून एका महिलेचा विश्वास संपादन करत तिचे भीषण शारीरिक तसेच मानसिक शोषण केल्याची अत्यंत संतापजनक घटना समोर आली आहे. पुण्यातील वृंदावन येथील तथाकथित संत इंद्रदेव महाराज याच्यावर मीरा रोड येथील एका ४२ वर्षीय महिलेने बलात्कारासह गंभीर स्वरूपाचे आरोप केले असून, याप्रकरणी काशिमीरा पोलीस ठाण्यात गुन्हा नोंदवण्यात आला आहे. या धक्कादायक प्रकारामुळे संपूर्ण परिसरात तीव्र संतापाची लाट उसळली आहे.
पीडित महिलेने पत्रकार परिषद घेऊन या ढोंगी प्रकाराची वाच्यता केली. दिलेल्या माहितीनुसार, जानेवारी २०२३ मध्ये समाजमाध्यमांवरील प्रवचनांच्या माध्यमातून ती महाराजाच्या संपर्कात आली होती. त्यानंतर एप्रिल २०२३ मध्ये सांताक्रूझ येथे झालेल्या सत्संगात सहभागी होऊन तिने महाराजाकडून दीक्षा घेतली. वैयक्तिक अडचणी दूर करण्याचे खोटे आश्वासन देऊन महाराजानी तिचा विश्वास संपादन केला आणि तिच्या वैयक्तिक आयुष्यात हस्तक्षेप सुरू केला.
पुढे या श्रद्धेचा गैरफायदा घेत सेवाधाम आश्रमात मुक्कामी असताना रात्री साडेदहाच्या सुमारास महाराजांनी महिलेला स्वतःच्या कक्षात बोलावून घेतले. कोणाला शंका आल्यास औषध आणायला जात असल्याचे सांग, अशी सूचनाही त्याने केली होती. खोलीत प्रवेश करताच दरवाजा आतून बंद करून बळजबरीने शारीरिक संबंध प्रस्थापित केल्याचा गंभीर जबाब पीडितेने नोंदवला आहे. एवढ्यावरच न थांबता २९ नोव्हेंबर २०२५ आणि २१ जानेवारी २०२६ रोजी महाराजाने व्हिडिओ कॉल करून स्वतःचे कपडे उतरवून अश्लील चाळे केले व महिलेवरही तशीच सक्ती केली, असा आरोप करण्यात आला आहे.
याशिवाय, महाराजाची नजर तिच्या कौटुंबिक संपत्तीवरही होती आणि वारसाच्या नावाखाली तिच्या मुलीचा सांभाळ करण्याचे आमिष दाखवून दबाव आणला जात होता. हा संपूर्ण गैरप्रकार पीडितेने अन्य एका महिलेला सांगितल्यानंतर महाराजाने बदनामी झाल्यास आत्महत्या करण्याची व ‘तुम्हे छोडूंगा नहीं’ अशी थेट जीवे मारण्याची धमकी १७ जून २०२६ रोजी दिल्याचेही तिने नमूद केले. सुरुवातीला बदनामीच्या भीतीमुळे शांत राहिलेल्या या महिलेने अखेर हिंमत दाखवून पोलिसांत धाव घेत तक्रार दाखल केली. धार्मिकतेच्या नावाखाली वासनेचा बाजार मांडणाऱ्या या प्रकरणाची पोलीस आता सखोल चौकशी करत आहेत.
