सिकंदर फरास/दाभोळे: यंदाच्या हंगामात पावसाचे प्रमाण कमी राहिल्याने भविष्यात उद्भवणाऱ्या तीव्र पाणीटंचाईच्या संकटावर वेळीच मात करण्यासाठी दाभोळे येथे प्रभावी उपाययोजना हाती घेण्यात आली आहे. रवी इन्फ्राच्या सहकार्याने आणि दाभोळे ग्रामपंचायतीचे माजी सरपंच राजेश रेवाळे यांच्या विशेष पुढाकारातून काजळी नदीच्या पात्रात ठिकठिकाणी तात्पुरते बंधारे बांधून पाणी अडवण्याची मोहीम राबवण्यात आली. संभाव्य पाणीटंचाईची दाहकता ओळखून ऐनवेळी धावपळ करण्यापेक्षा घेतलेल्या या दूरगामी निर्णयाचे पंचक्रोशीतून कौतुक होत आहे.
पावसाळ्यानंतर नदीतील पाण्याचा प्रवाह कमी झाल्यास पुढील उन्हाळ्यात पिण्याच्या तसेच दैनंदिन वापराच्या पाण्याचा गंभीर प्रश्न निर्माण होण्याची भीती होती. ही वस्तुस्थिती लक्षात घेऊन नदीपात्रात पाणी साठवून ठेवण्यासाठी ही तातडीची मोहीम राबवण्यात आली. काजळी नदीवर ठिकठिकाणी बांधण्यात आलेल्या या बंधाऱ्यांमुळे मुबलक पाणीसाठा उपलब्ध राहणार असून, भूगर्भातील पाणीपातळी वाढून नदीकाठच्या परिसरातील विहिरींच्या पाण्याच्या पातळीत मोठी वाढ होणार आहे. परिणामी, उन्हाळ्याच्या दिवसांतही परिसरातील गावांचा आणि वाड्यांचा पाणीपुरवठा सुरळीत राहण्यास कोणतीही अडचण येणार नाही.
या उपक्रमाबाबत माहिती देताना माजी सरपंच राजेश रेवाळे यांनी सांगितले की, या बंधाऱ्यांमध्ये पाणी अडवल्यामुळे परिसरातील भूजल पातळी टिकून राहील. याचा थेट फायदा शिवगणवाडी, सांडिमवाडी, बेलकरवाडी, दाभोळे बाजारपेठ, ओमलेवाडी, परडेवाडी आणि जोयशीवाडीसह आजूबाजूच्या विविध वाड्या-वस्त्यांना मोठ्या प्रमाणावर होणार आहे. या कामाच्या वेळी ग्रामस्थ अंकुश सांडिम हेदेखील उपस्थित होते. ऐन कडक उन्हाळ्यात नागरिकांना आणि जनावरांना पाण्यासाठी वणवण भटकंती करावी लागू नये, यासाठी वेळीच राबवलेल्या या जलसंधारण मोहिमेबद्दल दाभोळेसह परिसरातील ग्रामस्थांमधून समाधान व्यक्त होत आहे.
