खेड : तालुक्यातील अत्यंत वर्दळीचे केंद्र मानल्या जाणाऱ्या खेड एसटी स्थानकातील शौचालयांमध्ये निर्माण झालेली कमालीची अस्वच्छता आणि असह्य दुर्गंधी याविरोधात भारतीय जनता पार्टीने आक्रमक पवित्रा घेत ‘चिंपाट व टमरेल’ आंदोलन छेडले. दररोज हजारो प्रवाशांची ये-जा असणाऱ्या या प्रमुख आगारात प्रवाशांना प्राथमिक व मूलभूत सुविधांपासून वंचित राहावे लागत असल्याचा आरोप करत आंदोलकांनी एसटी महामंडळाच्या ढिसाळ कारभारावर जोरदार ताशेरे ओढले. सार्वजनिक ठिकाणी प्रवाशांना स्वच्छ आणि आरोग्यदायी वातावरण पुरवणे ही प्रशासनाची प्राथमिक जबाबदारी असतानाही त्याकडे साफ दुर्लक्ष होत असल्याने प्रवाशांचे आरोग्य धोक्यात आले आहे, ही बाब आंदोलनाच्या माध्यमातून चव्हाट्यावर आणण्यात आली.
यावेळी आंदोलनाचे नेतृत्व करताना भाजपा नेते तथा माजी नगराध्यक्ष ॲड. वैभव खेडेकर यांनी आगार प्रशासनाच्या कारभारावर तीव्र संताप व्यक्त केला. शौचालयांची तातडीने युद्धपातळीवर स्वच्छता करावी, दुर्गंधी कायमस्वरूपी नष्ट करावी आणि प्रवाशांच्या मूलभूत अधिकारांची पायमल्ली थांबवावी, अशी ठाम मागणी त्यांनी लावून धरली. तसेच या गंभीर समस्येवर कायमस्वरूपी तोडगा काढण्यासाठी एसटी प्रशासनाला चार दिवसांची स्पष्ट मुदत देण्यात आली असून या निर्धारित कालावधीत स्वच्छतेचा प्रश्न निकाली न निघाल्यास तीव्र जनआंदोलन छेडण्याचा थेट इशारा ॲड. खेडेकर यांनी दिला.
या जनआक्रोशाच्या वेळी भाजपा उत्तर रत्नागिरी जिल्हा उपाध्यक्ष संजय आखाडे, खेड शहराध्यक्ष भालचंद्र उर्फ नंदू साळवी, ट्रान्सपोर्ट सेल तालुकाध्यक्ष सुयश खेडेकर, रिक्षा सेल तालुकाध्यक्ष राजन खेडेकर, रिक्षा युनिट उपतालुकाध्यक्ष संदीप शेंडगे व तुषार पवार, युवा मोर्चा तालुकाध्यक्ष विशाल होळकर, महिला मोर्चा तालुकाध्यक्ष तथा माजी नगराध्यक्षा उर्मिला शेट्ये-पाटणे, महिला मोर्चा शहराध्यक्षा आशा सनगरे, शहर उपाध्यक्ष प्रीती चिखले, शहर चिटणीस आर्या कारेकर, शक्तीकेंद्र प्रमुख वैजेश सागवेकर, शहर सरचिटणीस विजय गुप्ता, शहर चिटणीस अमित खेडेकर व अनिकेत पवार, नंदू शिर्के, तळे-सोंडे विभाग बूथ अध्यक्ष दत्तात्रय मोरे, सोशल मीडिया प्रमुख सर्वेश पवार, ओवैस चौगुले, अक्षय सनगरे, बाळु वर्मा आणि प्रदीप भोसले यांच्यासह पक्षाचे सर्व प्रमुख पदाधिकारी व कार्यकर्ते मोठ्या संख्येने उपस्थित होते.
