पतीसह सासरच्या पाच जणांवर गुन्हा
रत्नागिरी : सासरच्या मंडळींकडून होत असलेल्या कथित शारीरिक व मानसिक छळाला कंटाळून ३२ वर्षीय विवाहितेने इमारतीच्या चौथ्या मजल्यावरून उडी मारून आत्महत्येचा प्रयत्न केल्याची धक्कादायक घटना रत्नागिरी शहरातील राजीवडा परिसरात घडली. या घटनेत विवाहिता गंभीर जखमी झाली असून तिच्यावर रत्नागिरी येथील सिव्हिल हॉस्पिटलमध्ये उपचार सुरू आहेत. या प्रकरणी महिलेच्या तक्रारीवरून पतीसह सासरच्या पाच जणांविरोधात रत्नागिरी शहर पोलीस ठाण्यात गुन्हा दाखल करण्यात आला आहे.
आशना इम्रान सुवर्णदुर्गकर (वय ३२, रा. राजीवडा, रत्नागिरी) असे गंभीर जखमी झालेल्या विवाहितेचे नाव आहे. पोलिसांत दाखल तक्रारीनुसार, एप्रिल २०२६ ते २६ सप्टेंबर २०२६ या कालावधीत आशना यांना सासरच्या मंडळींकडून सातत्याने शारीरिक व मानसिक त्रास दिला जात असल्याचा आरोप आहे. ‘तू फुकट आली आहेस, माहेरून फ्लॅट घेण्यासाठी पैसे आण, अन्यथा आमच्या मुलाचा दुसरा विवाह करून देऊ,’ अशा प्रकारचे टोमणे मारून त्यांचा छळ केला जात असल्याचे तक्रारीत नमूद करण्यात आले आहे.
तक्रारीनुसार, घराबाहेर जाताना आशना यांच्या पर्सची तपासणी करणे, त्यांना किंवा त्यांच्या मुलांना कौटुंबिक कार्यक्रमांसाठी बाहेर जाऊ न देणे, तसेच त्यांना घरातील एका खोलीत कोंडून ठेवणे, असे प्रकारही करण्यात आल्याचा आरोप आहे. त्यांच्या दोन्ही लहान मुलांना स्वतःकडे ठेवून आशना यांना एकटीलाच माहेरी पाठवून दिले जात असल्याचेही तक्रारीत म्हटले आहे. गेल्या आठ दिवसांपासून त्या आपल्या मुलांची मागणी करत होत्या; मात्र त्यांना मुले देण्यास नकार दिला जात असल्याचा आरोप त्यांनी केला आहे.
या कथित त्रासाला कंटाळून २६ सप्टेंबर रोजी दुपारी सुमारे ३ वाजता आशना यांनी आपला मोबाईल घरातच ठेवून राजीवडा येथील घर सोडले. त्यानंतर सायंकाळी सुमारे ७.३० वाजण्याच्या सुमारास त्यांनी अलहमपार्क, मांडवी, रत्नागिरी येथील अपार्टमेंटच्या ‘आय’ विंगमधील चौथ्या मजल्यावरून खाली उडी मारली. या घटनेत त्यांच्या उजव्या हाताला, उजव्या पायाला तसेच शरीराच्या इतर भागांना गंभीर दुखापत झाली.
घटनेनंतर त्यांना तातडीने उपचारासाठी चिंतामणी हॉस्पिटलमध्ये दाखल करण्यात आले. प्राथमिक उपचारानंतर पुढील उपचारासाठी त्यांना रत्नागिरी येथील सिव्हिल हॉस्पिटलमध्ये हलविण्यात आले. सध्या त्यांच्यावर उपचार सुरू आहेत.
या प्रकरणी आशना यांच्या तक्रारीवरून पती इम्रान खलील सुवर्णदुर्गकर, सासरे खलील सुवर्णदुर्गकर, सासू नसिरो सुवर्णदुर्गकर तसेच आत्या सरवरी सुवर्णदुर्गकर आणि परवीन मुनाब सुवर्णदुर्गकर (सर्व रा. राजीवडा, रत्नागिरी) यांच्याविरोधात रत्नागिरी शहर पोलीस ठाण्यात गुन्हा दाखल करण्यात आला आहे. या प्रकरणाचा पुढील तपास सहाय्यक पोलीस उपनिरीक्षक संदेश वसंत चव्हाण करीत आहेत.
