गणपतीपुळे (वैभव पवार): रत्नागिरी तालुक्यातील मालगुंड येथील कोकण मराठी साहित्य परिषद (कोमसाप) शाखेच्या वतीने उद्या, रविवार दिनांक ४ ऑक्टोबर रोजी एका महत्त्वपूर्ण विशेष सभेचे आयोजन करण्यात आले आहे. कवी केशवसुत स्मारक सभागृहात सायंकाळी चार वाजता शाखेच्या अध्यक्षा नलिनी खेर यांच्या अध्यक्षतेखाली ही सभा पार पडणार असून आगामी साहित्यिक उपक्रमांच्या पार्श्वभूमीवर या बैठकीला मोठे महत्त्व प्राप्त झाले आहे. या सभेसाठी कोमसाप कार्यकारिणी सदस्य, कवी केशवसुत स्मारक समिती सदस्य, मालगुंड ग्रामपंचायतीचे सरपंच तसेच ब. प. विद्यालयाचे मुख्याध्यापक यांना विशेष निमंत्रित करण्यात आले आहे.
या सभेमध्ये प्रामुख्याने आगामी २३, २४ आणि २५ ऑक्टोबर रोजी संपन्न होणाऱ्या बहुचर्चित ‘अभिजात भाषा आंतरराष्ट्रीय परिषदे’च्या पूर्वतयारीची सविस्तर माहिती देऊन रूपरेषा निश्चित केली जाणार आहे. तसेच येत्या २७, २८ आणि २९ नोव्हेंबर रोजी मालगुंड येथे रंगणाऱ्या ‘केंद्रीय साहित्य संमेलना’च्या नियोजनावरही या बैठकीत वरिष्ठ पदाधिकाऱ्यांकडून मार्गदर्शन केले जाणार असून गठीत करण्यात आलेल्या विविध समित्या आणि त्यांच्या जबाबदाऱ्यांवर सखोल चर्चा करण्यात येईल.
याशिवाय मालगुंडमध्ये साकारल्या जाणाऱ्या ‘पुस्तकांचे गाव’ उपक्रमांतर्गत मंजूर झालेल्या निवडक दालनांबाबत या बैठकीत आढावा घेतला जाणार आहे. यामध्ये ब. प. विद्यालय मालगुंड, संस्थान श्री देव गणपतीपुळे, बुद्धविहार मालगुंड, अमित प्रभाकर मेहंदळे, निनाद श्रीकर कोसुंबकर, मोरेश्वर गोविंद मुळ्ये, शेखर मधुकर खेऊर, आर. डी. सी. सी. बँक मालगुंड, आदर्श जीवन शिक्षण शाळा मालगुंड नं. १ आणि प्रभाकर मोरेश्वर घनवटकर या दहा मंजूर दालनधारकांना या बैठकीस न चुकता उपस्थित राहण्याचे सूचित करण्यात आले आहे. साहित्याची ही मोठी पर्वणी यशस्वी करण्यासाठी कोमसाप कार्यकारिणीतील सर्व सदस्यांनी व संबंधितांनी वेळेवर उपस्थित राहावे, असे आवाहन कोमसाप मालगुंड शाखेच्या अध्यक्षा नलिनी खेर आणि सचिव विलास राणे यांनी केले आहे.
