१७ हजारांहून अधिक ज्येष्ठांच्या बँक खात्यात थेट प्रत्येकी ३ हजार रुपयांचे अर्थसहाय्य वर्ग
रत्नागिरी: वयाची पासष्टी ओलांडलेल्या ज्येष्ठ नागरिकांचे दैनंदिन जीवन सुकर व्हावे आणि त्यांच्या उतारवयातील गरजांना आर्थिक मदतीचा बळकट आधार मिळावा, या उदात्त हेतूने राज्य शासनाच्या सामाजिक न्याय विभागामार्फत सुरू करण्यात आलेली ‘मुख्यमंत्री वयोश्री योजना’ जिल्ह्यात अत्यंत प्रभावीपणे राबवली जात आहे. चालू आर्थिक वर्षात शासनाने या लोककल्याणकारी योजनेसाठी १६६.३० कोटी रुपयांच्या भरीव निधीची तरतूद केली असून, त्याअंतर्गत रत्नागिरी जिल्ह्यातील तब्बल १७ हजार ४२३ पात्र लाभार्थ्यांच्या बँक खात्यात थेट प्रत्येकी तीन हजार रुपयांचे अनुदान वर्ग (डीबीटी) करण्यात आले आहे. या थेट आर्थिक मदतीमुळे जिल्ह्यातील हजारो थकलेल्या हातांना मोठा दिलासा मिळाला आहे.
वाढत्या वयासोबत उद्भवणारे विविध शारीरिक आजार, अपंगत्व आणि असमर्थतेवर मात करण्यासाठी ही योजना ज्येष्ठ नागरिकांसाठी अत्यंत उपयुक्त ठरत आहे. खात्यात जमा झालेल्या या रकमेतून ज्येष्ठांना त्यांच्या दैनंदिन हालचालींसाठी आवश्यक असणारी काठी, चष्मा, श्रवणयंत्र, वॉकर, व्हीलचेअर आणि नी-ब्रेससारखी वैद्यकीय व सहाय्यक उपकरणे स्वतः खरेदी करता येत आहेत. केवळ शारीरिक व्याधींवर उपचारापुरते मर्यादित न राहता, वृद्धापकाळातील एकटेपणा आणि नैराश्यावर मात करण्याच्या दृष्टीने समुपदेशन केंद्रे तसेच मनःस्वास्थ्याशी संबंधित उपक्रमांनाही या योजनेच्या माध्यमातून बळ देण्यात येत आहे.
या योजनेचा लाभ मिळवण्यासाठी ६५ वर्षे किंवा त्याहून अधिक वय असलेले ज्येष्ठ नागरिक ‘आपले सरकार’ अथवा ‘महा-ई-सेवा’ केंद्रावर जाऊन ऑनलाइन पद्धतीने अर्ज नोंदवू शकतात. याशिवाय समाजकल्याण विभागाचे अधिकृत पोर्टल, स्थानिक पंचायत समिती किंवा जिल्हा समाजकल्याण अधिकारी कार्यालयात थेट जाऊन अर्ज सादर करण्याची सुविधाही उपलब्ध करून देण्यात आली आहे. ज्येष्ठ नागरिकांचा स्वाभिमान आणि मानसन्मान जपत त्यांचे उर्वरित जीवन अधिक सुकर व स्वावलंबी बनवण्यासाठी ही योजना जिल्ह्यात अत्यंत महत्त्वपूर्ण भूमिका बजावत आहे.
