रत्नागिरी: रत्नागिरी मध्यवर्ती बस स्थानकातील केंद्रावर एनसीएमसी स्मार्ट कार्ड नोंदणी आणि प्रत्यक्ष कार्ड वितरण प्रक्रियेला लागलेली तांत्रिक अडचणींची कीड प्रवाशांच्या मुळावर आली आहे. प्रशासनाचा कमालीचा संथ कारभार, वारंवार डाऊन होणारा सर्व्हर आणि तासनतास ताटकळत उभे राहणाऱ्या नागरिकांच्या सहनशीलतेचा अंत पाहणारी व्यवस्था यामुळे सामान्य नागरिकांसह विशेषतः ज्येष्ठ नागरिकांना प्रचंड मनस्ताप सहन करावा लागत आहे. नोंदणी करून महिना उलटला तरी कार्ड हातात न पडल्याने लोकांमध्ये संतापाची तीव्र लाट उसळली आहे.
स्थानिक रहिवासी उज्ज्वला विपुल गुप्ते यांनी व्यवस्थेच्या कारभारावर तीव्र नाराजी व्यक्त करत सांगितले की, कार्डसाठी नोंदणी करून महिना लोटला आहे. शनिवारी कार्ड घेण्यासाठी बोलावल्यानंतर त्या केंद्रावर गेल्या; मात्र त्यानंतर शुक्रवारी व १४ तारखेला अशा लागोपाठ चकरा मारूनही कार्ड ॲक्टिव्हेट होत नसल्याचे सांगण्यात आले. मंगळवारी सकाळी १० वाजल्यापासून त्या पुन्हा केंद्रावर ताटकळत थांबल्या, तरी दुपारी दीड वाजेपर्यंत त्यांचा नंबर आलाच नाही. त्यातच संबंधित कर्मचारी जेवणाच्या सुट्टीसाठी निघून गेल्यामुळे रांगेतील सामान्य नागरिकांना केवळ हताशपणे वाट पाहत उभे राहावे लागले.
मानसी वैद्य या दुसऱ्या एका महिलेनेही आपली कैफियत मांडताना सांगितले की, त्या कार्ड काढण्यासाठी गेल्या महिन्याभरापासून सतत चकरा मारत आहेत. पंधरा-वीस दिवसांपूर्वी आल्या असताना सर्व्हर डाऊन असल्याचे कारण सांगून त्यांना माघारी धाडण्यात आले. सध्या अनेक नागरिक पहाटे ६ वाजल्यापासून रांगेत उभे राहत असून, काही जण सकाळी ११ वाजेपासून रांगेत ताटकळत आहेत. गर्दीच्या वेळेत अधिक कर्मचाऱ्यांची नियुक्ती करून काम जलद गतीने मार्गी लावावे, अशी आग्रही मागणी त्यांनी केली आहे.
वयस्कर आणि ज्येष्ठ नागरिकांना शारीरिक त्रास सहन करत तासनतास रांगेत उभे राहावे लागत असल्याने त्यांचे प्रचंड हाल होत आहेत. रत्नागिरी मध्यवर्ती बस स्थानकातील या केंद्रावरील अनागोंदीमुळे जनतेचा अत्यंत मौल्यवान वेळ वाया जात असून, वरिष्ठ प्रशासनाने तातडीने या तांत्रिक त्रुटी दूर करून योग्य सोयी-सुविधा पुरवाव्यात आणि ही संपूर्ण प्रक्रिया जलद व सुलभ करावी, अशी जोरदार मागणी प्रवाशांमधून केली जात आहे.
