रत्नागिरी : मुलींचे अस्तित्व, शिक्षण आणि सुरक्षितता यांवर समाजाचे भवितव्य अवलंबून असून गर्भलिंग निवडीसारख्या अनिष्ट प्रकारांना आळा घालण्यासाठी सर्व यंत्रणांनी अधिक संवेदनशीलतेने व जबाबदारीने काम करणे ही काळाची गरज असल्याचा सूर माळनाका येथील शासकीय विश्रामगृहाच्या सभागृहात उमटला. जिल्हा महिला व बाल विकास अधिकारी मनोज पाटणकर यांच्या मार्गदर्शनाखाली ‘बेटी बचाओ, बेटी पढाओ’ अभियानांतर्गत आरोग्य विभागातील अधिकारी, कर्मचारी, गर्भवती महिलांशी संबंधित सेवा देणारे घटक आणि आशा सेविकांसाठी एका विशेष मार्गदर्शनपर कार्यशाळेचे यशस्वी आयोजन करण्यात आले होते. याप्रसंगी प्रमुख मार्गदर्शक म्हणून जिल्हा शल्यचिकित्सक कार्यालयाच्या विधी सल्लागार अनविक्षा पावसकर यांनी उपस्थित आरोग्य कर्मचाऱ्यांना मार्गदर्शन केले. त्यांनी गर्भलिंग निदान प्रतिबंधक (PCPNDT) कायद्यातील कठोर तरतुदी, कायद्याची प्रभावी अंमलबजावणी आणि नियमांचे उल्लंघन झाल्यास होणारी कायदेशीर कारवाई याविषयी सविस्तर माहिती दिली; तसेच बालकांचे लैंगिक अत्याचारापासून संरक्षण करणाऱ्या ‘पोक्सो’ (POCSO) कायद्याचे स्वरूप, बालकांचे हक्क आणि अशा संवेदनशील प्रकरणांमध्ये प्रशासकीय व आरोग्य यंत्रणांनी तत्परतेने पार पाडायच्या जबाबदाऱ्या यावर प्रकाश टाकत कर्मचाऱ्यांच्या विविध शंकांचे निरसन केले.
या कार्यशाळेत उपस्थितांशी संवाद साधताना तालुका आरोग्य अधिकारी डॉ. शीतल सूर्यवंशी यांनी गर्भवती महिलांची नोंदणी आणि आरोग्य तपासणी करताना कायद्याच्या सर्व नियमांचे तंतोतंत पालन व्हावे, मुलींच्या जन्माचे स्वागत करणारी सकारात्मक मानसिकता समाजात निर्माण व्हावी आणि स्त्री-पुरुष समानता रुजविण्यासाठी आरोग्य यंत्रणेतील प्रत्येक घटकाने सतत सजग राहावे, असे आवाहन केले. दरम्यान, महिला व बाल विकास विभागाच्या लोककल्याणकारी योजना, पीडित महिला व बालकांच्या मदतीसाठी चोवीस तास अविरत कार्यरत असणारी चाइल्ड हेल्पलाइन, सखी वन स्टॉप सेंटरची कार्यपद्धती आणि शासकीय योजनांचा लाभ समाजातील शेवटच्या घटकापर्यंत पोहोचवण्याच्या कार्यपद्धतींविषयी कार्यशाळेत विस्तृत माहिती देण्यात आली, तसेच महिला व बालकांवरील अत्याचारांना प्रतिबंध घालण्यासाठी विविध विभागांमधील परस्पर समन्वय किती निर्णायक ठरतो, हेही विशेषत्वाने अधोरेखित करण्यात आले. या महत्त्वपूर्ण कायदेविषयक कार्यशाळेला जिल्हा संरक्षण अधिकारी लहू पगडे, चाइल्ड हेल्पलाइन प्रकल्प समन्वयक अन्वी शिंदे, सखी वन स्टॉप सेंटरच्या केंद्र प्रशासक अश्विनी मोरे, महिला सक्षमीकरण विभागाच्या श्रद्धा गांधी यांच्यासह आरोग्य कर्मचारी व आशा सेविका मोठ्या संख्येने उपस्थित होत्या.
