सोलापूर : श्रद्धेने स्वामी समर्थांच्या दर्शनासाठी घराबाहेर पडलेल्या भारंबे कुटुंबाच्या आनंदाच्या प्रवासाचा भीषण अपघाताने अंत झाला. अक्कलकोटच्या दिशेने जात असताना मोहोळ तालुक्यातील शेटफळ ते तेलंगवाडी दरम्यान कार आणि कंटेनरची जोरदार धडक झाली. या काळजाचा थरकाप उडवणाऱ्या दुर्घटनेत अवघ्या आठ वर्षांच्या चिमुरड्यासह एकाच कुटुंबातील तिघांना प्राण गमवावे लागले, तर अन्य दोघे गंभीर जखमी झाले आहेत. दर्शनासाठी निघालेल्या कुटुंबावर वाटेतच काळाने झडप घातल्याने परिसरात हळहळ व्यक्त होत आहे.
मिळालेल्या माहितीनुसार, मुंबईतील कल्याण येथून भारंबे कुटुंबीय अक्कलकोट येथे स्वामी समर्थांच्या दर्शनासाठी कारने रवाना झाले होते. प्रवासादरम्यान मोहोळ तालुक्यातील शेटफळ आणि तेलंगवाडी गावांदरम्यान दुपारी सुमारे ३ वाजण्याच्या सुमारास त्यांच्या कारची कंटेनरला जोरदार धडक बसली. धडक इतकी भीषण होती की कारमधील प्रवाशांना सावरण्याची संधीही मिळाली नाही. या दुर्घटनेत पार्थ तुषार भारंबे (वय ८), विलास चांगु भारंबे (वय ६६) आणि शोभा विलास भारंबे (वय ६३) यांचा जागीच मृत्यू झाला.
या अपघातात तुषार विलास भारंबे आणि पूनम तुषार भारंबे हे पती-पत्नी गंभीर जखमी झाले आहेत. अपघातानंतर जखमींना तातडीने उपचारासाठी रुग्णालयात दाखल करण्यात आले. प्रकृती गंभीर असल्याने त्यांना पुढील उपचारासाठी शासकीय रुग्णालयात हलवण्यात आल्याची माहिती आहे.
एका बाजूला देवदर्शनाची ओढ आणि दुसऱ्या बाजूला कुटुंबासोबत आनंदाने सुरू झालेला प्रवास; मात्र काही क्षणांतच या प्रवासाचे रूपांतर भीषण शोकांतिकेत झाले. एकाच कुटुंबातील तीन पिढ्यांवर या दुर्घटनेने आघात केला आहे. आठ वर्षांच्या पार्थचा निष्पाप जीव आणि त्याच्यासोबत आजी-आजोबांचा झालेला मृत्यू यामुळे भारंबे कुटुंबावर दुःखाचा डोंगर कोसळला आहे.
दरम्यान, या भीषण अपघाताची माहिती मिळताच संबंधित यंत्रणांनी घटनास्थळी धाव घेतली. अपघात नेमका कोणत्या कारणामुळे घडला, याचा तपास सोलापूर पोलीस करत आहेत. देवदर्शनासाठी निघालेल्या भारंबे कुटुंबाच्या प्रवासाचा असा दुर्दैवी शेवट झाल्याने सर्वत्र हळहळ व्यक्त होत आहे.
