दापोली (विशेष प्रतिनिधी): दापोली अर्बन बँकेचे विद्यमान संचालक तथा माजी उपाध्यक्ष माधव रामचंद्र ऊर्फ एम. आर. शेट्ये यांच्या सामाजिक आणि कृषी क्षेत्रातील उल्लेखनीय योगदानाची आंतरराष्ट्रीय स्तरावर दखल घेण्यात आली असून, अमेरिका येथील जागतिक मानवाधिकार आयोगाशी संलग्न असलेल्या नामांकित विद्यापीठाने त्यांना मानद डॉक्टरेट पदवी जाहीर केली आहे. या संदर्भातील अधिकृत पत्र विद्यापीठाकडून प्राप्त झाल्यानंतर बुधवार, दिनांक २८ ऑक्टोबर रोजी देशाची राजधानी दिल्ली येथे आयोजित भव्य पदवीदान सोहळ्यात ही पदवी त्यांना प्रदान करण्यात आली. या दिमाखदार समारंभाला ओडिशाचे माजी मुख्यमंत्री नवीन पटनाईक, आंध्र प्रदेशचे माजी राज्यपाल विश्वभूषण हरिचंदन यांच्यासह संबंधित विद्यापीठाचे कुलगुरू व संचालक प्रामुख्याने उपस्थित होते. यावेळी शेट्ये यांना डॉक्टरेट पदवीसोबतच जागतिक मानवाधिकार संरक्षण समितीचे मानाचे सभासदत्वही बहाल करून गौरविण्यात आले.
एक प्रगतीशील शेतकरी अशी ख्याती असलेल्या माधव शेट्ये यांनी ग्रामीण अर्थव्यवस्थेला बळकटी देण्यासाठी सातत्याने धोरणात्मक प्रयत्न केले आहेत. २००१ ते २००३ या काळात दापोली तालुका रोजगार हमी समितीचे अध्यक्षपद भूषवताना त्यांनी ग्रामीण रस्त्यांचे जाळे, शेतीसाठी जव्हार विहिरींची निर्मिती आणि सर्वांगीण ग्रामविकासात मोलाची भूमिका बजावली होती. कोकणातील शेतीपुढील ज्वलंत प्रश्न ऐरणीवर आणण्यासाठी २०२३ मध्ये त्यांनी दापोली ते भारतरत्न डॉ. बाबासाहेब आंबेडकर यांचे जन्मगाव असलेल्या आंबडवे (मंडणगड) दरम्यान सुमारे ६० किलोमीटर अंतराची ऐतिहासिक ‘शेतकरी संवाद पदयात्रा’ काढली होती. पारंपरिक भात, नाचणी आणि वरी या पिकांचा समावेश रोजगार हमी योजनेत व्हावा, जेणेकरून शेतीखालील क्षेत्र विस्तारून स्थानिक पातळीवर रोजगारनिर्मिती होईल, यासाठी त्यांनी सातत्यपूर्ण पाठपुरावा केला. कृषीविषयक ज्ञानाचा प्रसार शेतकऱ्यांपर्यंत व्हावा या हेतूने प्रा. प्रभाकर शिंदे यांच्या सहकार्याने ‘कोकणातील नफ्याची शेती’ या युट्यूब चॅनेलच्या माध्यमातून लोकशिक्षणाचा नाविन्यपूर्ण उपक्रमही त्यांनी राबवला.
पुण्याचे श्री. धुंडिराज पाठक यांच्या मार्गदर्शनाखाली वास्तू व वृक्षांचा सखोल अभ्यास करणाऱ्या शेट्ये यांनी रिझर्व्ह बँकेच्या पुणे येथील प्रशिक्षण केंद्रातून कृषी बँकिंगचे विशेष प्रशिक्षण पूर्ण केले आहे. २०१२ च्या आंतरराष्ट्रीय सहकार वर्षात भारत-श्रीलंका सहकार परिषदेमध्ये दापोली अर्बन बँकेचे अधिकृत प्रतिनिधित्व करण्याचा मान त्यांना मिळाला होता. वृत्तपत्रीय स्तंभलेखनासोबतच शंभरहून अधिक दर्जेदार कार्यक्रमांचे प्रभावी सूत्रसंचालन करून त्यांनी सांस्कृतिक व प्रबोधन क्षेत्रात स्वतंत्र ठसा उमटवला आहे. आपल्या या बहुआयामी सामाजिक प्रवासात ज्येष्ठ नेते शरद पवार, माजी आमदार डॉ. चंद्रकांत मोकल, स्व. निशिकांत जोशी, खासदार सुनील तटकरे, दापोली अर्बन बँकेचे अध्यक्ष डॉ. जयवंत जालगावकर, स्व. डॉ. मेहेंदळे, विचारवंत स्व. हरी नरके, डॉ. विकास शेट्ये आणि प्रा. प्रभाकर शिंदे यांचे बहुमूल्य मार्गदर्शन व सहकार्य लाभल्याचे त्यांनी कृतज्ञतापूर्वक नमूद केले असून, आंतरराष्ट्रीय पातळीवरील या सर्वोच्च सन्मानामुळे दापोली तालुक्यासह संपूर्ण कोकणच्या शिरपेचात मानाचा तुरा रोवला गेला आहे.
