रत्नागिरी : मित्राला दिलेल्या शिवीगाळीचा वाद मिटवण्यासाठी गेलेल्या एका १९ वर्षीय महाविद्यालयीन तरुणावर मांडवी समुद्रकिनाऱ्यावर लोखंडी फायटरने बेदम मारहाण करत जीवघेणा हल्ला केल्याची धक्कादायक घटना घडली आहे. या हल्ल्यात स्वरूप रूपेश दोरखंडे (वय १९, रा. साईनगर, फणसोप हायस्कूल मागे, वरचा फणसोप, ता. जि. रत्नागिरी) हा तरुण गंभीर जखमी झाला असून, याप्रकरणी रत्नागिरी शहर पोलीस ठाण्यात दोन संशयित आरोपींविरुद्ध भारतीय न्याय संहितेन्वये विविध कलमांखाली गुन्हा दाखल करण्यात आला आहे.
मिळालेल्या माहितीनुसार, संशयित आरोपी रोहन ठिक (वय १९, रा. कोळंबे) याने फिर्यादी स्वरूप दोरखंडे याचा मित्र यश पवार याला फोनवरून शिवीगाळ केली होती. आपल्या मित्राला विनाकारण शिवीगाळ का केली, अशी विचारणा स्वरूपने फोनवरून केल्यावर रोहनने स्वरूपलाही अर्वाच्य भाषेत शिवीगाळ केली होती. अखेर हा वाद समोरासमोर बसून मिटवण्याचे ठरवून त्यांनी मांडवी समुद्रकिनारी भेटण्याचे निश्चित केले. त्यानुसार १ ऑक्टोबर २०२६ रोजी सकाळी साडेदहाच्या सुमारास स्वरूप दोरखंडे हा आपला मित्र यश पवार याच्यासह मांडवी बीचवर पोहोचला. त्या ठिकाणी रोहन ठिक हा आधीच त्याच्या इतर मित्रांसह उपस्थित होता. दोन्ही बाजूंचे बोलणे सुरू असतानाच संशयित सोहम पड्यार (वय १९, रा. पावस) याने अचानक वादात उडी घेत स्वरूपला शिवीगाळ करत कानशिलात लगावली. त्यानंतर रोहन ठिक यानेही त्याला मारहाण सुरू केली. याच दरम्यान सोहम पड्यार याने हातातील लोखंडी फायटरने स्वरूपच्या तोंडावर, डोक्यावर व पाठीवर सपासप वार करून त्याला गंभीर जखमी केले.
भरदिवसा पर्यटनाच्या ठिकाणी घडलेल्या या हिंसक प्रकारामुळे परिसरात एकच खळबळ उडाली. या हल्ल्यात जखमी झालेल्या स्वरूप दोरखंडे याने तात्काळ पोलीस ठाणे गाठून फिर्याद दिली. त्याच्या फिर्यादीवरून १ ऑक्टोबर रोजी सायंकाळी ५:०६ वाजता रत्नागिरी शहर पोलीस ठाण्यात गुन्हा रजिस्टर क्रमांक ३७८/२०२६ नुसार आरोपी रोहन ठिक आणि सोहम पड्यार यांच्याविरुद्ध भारतीय न्याय संहिता (BNS) २०२३ चे कलम ११८(१), ११५(२), ३५२ आणि ३(५) अंतर्गत गुन्हा दाखल करण्यात आला असून शहर पोलीस या प्रकरणाचा पुढील तपास करत आहेत.
