रत्नागिरी : शहरात बेकायदेशीररीत्या विक्रीसाठी साठवून ठेवण्यात आलेला गोवा बनावटीच्या दारूचा मोठा साठा जप्त करण्यात रत्नागिरी शहर पोलिसांच्या गुन्हे प्रकटीकरण पथकाला यश आले आहे. मुरुगवाडा दांडा फिशरीजच्या मागील बाजूस असलेल्या वरचीवाडी परिसरात गस्त घालत असताना संशयास्पद हालचालींवरून पोलिसांनी ही धडक कारवाई करत ६० वर्षीय इसमाला ताब्यात घेतले. प्रशांत शिवराम नागवेकर (वय ६०, रा. मुरुगवाडा, भैरी मंदिराच्या मागे, रत्नागिरी) असे ताब्यात घेण्यात आलेल्या इसमाचे नाव असून, त्याच्याकडून विविध ब्रँडच्या गोवा बनावटीच्या दारूच्या बाटल्यांसह एकूण २८ हजार ७१२ रुपये किमतीचा मुद्देमाल जप्त करण्यात आला आहे.
उपविभागीय पोलीस अधिकारी आकांक्षा यादव, परिविक्षाधीन पोलीस उपअधीक्षक अभिजीत थोरात आणि पोलीस निरीक्षक विवेक पाटील यांच्या मार्गदर्शनाखाली ही मोहीम राबवण्यात आली. या कारवाईत पोलीस उपनिरीक्षक सागर शिंदे, सहायक पोलीस फौजदार दीपक साळवी, पोलीस हवालदार शांताराम झोरे, अमोल भोसले, भालचंद्र मयेकर तसेच पोलीस कॉन्स्टेबल अमित पालवे आणि निलेश शिंगवे यांनी सहभाग घेतला. याप्रकरणी संबंधित इसमाविरुद्ध महाराष्ट्र दारूबंदी अधिनियम, १९५१ च्या कलम ६५ (ई) अन्वये गुन्हा दाखल करण्यात आला असून, हा दारूसाठा कुठून आणि कोणासाठी आणला होता, याचा पुढील तपास शहर पोलीस करत आहेत.
