रत्नागिरी: शहरातील कोकणनगर भागातील शिधापत्रिकाधारकांना भेडसावणारी धान्याची समस्या अखेर संपुष्टात आली असून, पुरवठा विभागाच्या ताज्या अहवालानुसार सप्टेंबरअखेर तब्बल ९८ टक्के नागरिकांपर्यंत धान्याचे यशस्वी वाटप करण्यात आले आहे. या भागातील नोंदणीकृत ७०० रेशनकार्डधारकांपैकी ६९४ लाभार्थ्यांना धान्य मिळाल्याने परिसरातील सर्वसामान्य नागरिकांमधून मोठा आनंद आणि समाधान व्यक्त होत आहे.
गेल्या काही काळापासून कोकणनगर परिसरातील नागरिकांना सार्वजनिक वितरण प्रणालीतून धान्य मिळवताना अनेक अडचणींना तोंड द्यावे लागत होते. तसेच नियमाप्रमाणे पूर्ण धान्याचा कोटा वेळेवर मिळत नसल्याच्या तक्रारीही वारंवार समोर येत होत्या. सामान्य जनतेची ही गैरसोय लक्षात घेऊन प्रभाग क्रमांक ४ चे नगरसेवक केतन उमेश शेट्ये आणि नगरसेविका फौजिया तन्वीर मुजावर यांनी पुरवठा विभागाकडे सातत्यपूर्ण पाठपुरावा केला. नागरिकांना नियमित आणि विनाअडथळा धान्य मिळावे यासाठी त्यांनी नवीन रेशन दुकानाची व्यवस्था उभारण्यासाठी पुढाकार घेतला.
नवे दुकानदार सचिन सुर्वे यांच्याकडे ही धुरा सोपवल्यानंतर वितरण व्यवस्थेला खरी गती मिळाली असून, वाटपाची प्रक्रिया अत्यंत पारदर्शक व सुरळीत झाली आहे. नगरसेवकांनी दाखवलेली तत्परता आणि केलेल्या यशस्वी प्रयत्नांमुळे रेशनधारकांना मोठा दिलासा मिळाला असून, लाभार्थ्यांच्या हक्काचे धान्य त्यांच्या पदरात पडल्याने कोकणनगरातील जनतेने समाधान व्यक्त केले आहे.
