डोंबिवली: शहराला काळिमा फासणारी आणि सुन्न करून सोडणारी एक अत्यंत धक्कादायक घटना डोंबिवलीत उघडकीस आली असून, घरासमोर खेळणाऱ्या अवघ्या चार वर्षांच्या निष्पाप चिमुकलीवर शेजारीच राहणाऱ्या एका ८५ वर्षीय नराधमाने अमानुष लैंगिक अत्याचार केल्याचा संतापजनक प्रकार समोर आला आहे. रामनगर पोलीस ठाण्याच्या हद्दीत घडलेल्या या हादरवून टाकणाऱ्या घटनेमुळे संपूर्ण परिसरात तीव्र संतापाची लाट उसळली आहे. पीडित बालिकेच्या सतर्क आईने दाखवलेल्या धाडसामुळे हा विकृत प्रकार वेळीच उघडकीस आला असून, पोलिसांनी तत्काळ कारवाईचा बडगा उचलत आरोपी वृद्धाला अटक केली आहे.
प्राप्त माहितीनुसार, पीडित चिमुकलीची आई घरात नेहमीप्रमाणे काम करत असताना तिची चार वर्षांची मुलगी घराबाहेर अंगणात खेळत होती. त्याच वेळी शेजारी राहणाऱ्या ८५ वर्षीय विकृत म्हाताऱ्याची नजर या बालिकेवर पडली. त्याने चिमुकलीला फूस लावून स्वतःच्या घरात बोलावून घेतले आणि तिच्यासोबत अत्यंत अयोग्य आणि संतापजनक कृत्य करण्यास सुरुवात केली. काही वेळाने काम संपवून आई घराबाहेर आली असता तिला मुलगी अंगणात दिसली नाही. तिने तातडीने आजूबाजूला शोधाशोध सुरू केली असता, मुलगी शेजाऱ्याच्या घरात असल्याचे तिच्या निदर्शनास आले. घरात डोकावून पाहताच त्या नराधमाचे गैरकृत्य आईच्या थेट नजरेस पडले. न डगमगता आईने तत्काळ त्या म्हाताऱ्याच्या तावडीतून आपल्या चिमुकलीची सुटका केली.
घटनेचे गांभीर्य ओळखून पीडितेच्या आईने थेट रामनगर पोलीस ठाणे गाठून नराधमाविरोधात तक्रार दाखल केली. या तक्रारीच्या आधारे पोलिसांनी तातडीने पावले उचलत आरोपीविरोधात भारतीय न्याय संहिता कलम ७५ (२) आणि बालकांचे लैंगिक अत्याचारापासून संरक्षण करणाऱ्या पोक्सो (POCSO) कायद्याच्या कलम ८ अन्वये गंभीर गुन्हा नोंदवला. त्यानंतर पोलिसांनी वेगवान हालचाली करत ८५ वर्षीय आरोपीला बेड्या ठोकल्या. कायद्यानुसार पीडित चिमुकलीची ओळख पूर्णपणे गोपनीय ठेवण्यात आली असून, या प्रकरणाचा पुढील कसून तपास रामनगर पोलीस करत आहेत.
