आटपाडी: सांगली जिल्ह्याला हादरवून सोडणाऱ्या गळवेवाडी येथील अल्पवयीन मुलीवरील अमानुष अत्याचार आणि हत्या प्रकरणात विटा सत्र न्यायालयाने अत्यंत कठोर भूमिका घेत ७० वर्षीय आरोपी शिवाजी कोंडीबा काळेल याला फाशीची शिक्षा सुनावली आहे. या खटल्यासोबतच अन्य दोन अल्पवयीन मुलींवरील लैंगिक अत्याचाराच्या दोन स्वतंत्र गुन्ह्यांमध्येही आरोपीला मरेपर्यंत जन्मठेपेची शिक्षा ठोठावण्यात आली आहे. जिल्हा व सत्र न्यायाधीश रविकरण भागवत यांच्या न्यायालयाने हा ऐतिहासिक निकाल दिला असून, सरकारी पक्षाच्या वतीने सरकारी वकील आरती आनंद देशपांडे-साठविलकर यांनी केलेला प्रभावी युक्तिवाद आरोपीला फाशीच्या तख्तापर्यंत पोहोचवण्यात निर्णायक ठरला.
गळवेवाडी परिसरातून ७ जानेवारी २०१८ रोजी दुपारी चारच्या सुमारास अल्पवयीन मुलगी अचानक घरातून बेपत्ता झाली होती. नातेवाइकांनी तिचा कसून शोध घेऊनही ती सापडली नाही; मात्र दुसऱ्या दिवशी सकाळी गळवेवाडीतील जगमाईच्या विहिरीत तिचा मृतदेह तरंगताना आढळून आल्याने खळबळ उडाली होती. वैद्यकीय तपासणी आणि शवविच्छेदन अहवालात मुलीवर लैंगिक अत्याचार करून तिचा गळा आवळून निर्घृण खून करण्यात आल्याचे निष्पन्न झाले. घटनेनंतर सुमारे सहा महिने मारेकऱ्याचा कोणताही सुगावा पोलिसांना लागत नव्हता. दरम्यानच्या काळात २६ जुलै २०१८ रोजी अन्य दोन अल्पवयीन मुलींवर लैंगिक अत्याचार केल्याप्रकरणी शिवाजी काळेलविरुद्ध गुन्हा दाखल झाला. या दुसऱ्या प्रकरणाच्या तपासात पीडित मुली आणि त्यांच्या आईचे न्यायालयात कलम १६४ अंतर्गत नोंदवलेले जबाब हत्येच्या गूढाचा उलगडा करणारे ठरले. ७ जानेवारी रोजी मृत मुलीसोबत काळेल उपस्थित असल्याची खात्रीशीर माहिती या जबाबातून समोर येताच पोलिसांनी तपासाची चक्रे वेगाने फिरवून काळेलला हत्या प्रकरणातील मुख्य आरोपी केले.
पोलिसांच्या सखोल तपासात आरोपीने हत्येनंतर मृतदेह लपवून तो विहिरीत फेकत पुरावे नष्ट करण्याचा पद्धतशीर प्रयत्न केल्याचे स्पष्ट झाले. घटनास्थळावरून जप्त करण्यात आलेल्या लोखंडी कणगी आणि चादरीवरील टिकली पीडित मुलीच्या आजी-आजोबांनी ओळखली, तर कोल्हापूर येथील न्यायवैज्ञानिक प्रयोगशाळेच्या फॉरेन्सिक अहवालात लोखंडी कणगीमध्ये मानवी रक्ताचे अंश आढळून आल्याने आरोपीच्या गुन्ह्याला भक्कम पुष्टी मिळाली. खटल्यादरम्यान सरकारी पक्षाने तपासलेले एकूण १९ साक्षीदार, प्रत्यक्ष साक्षीदारांचे जबाब आणि वैज्ञानिक पुरावे ग्राह्य धरत न्यायालयाने आरोपीला तिन्ही प्रकरणांत दोषी ठरवले. अल्पवयीन मुलीवरील अत्याचार आणि हत्येसाठी फाशी तर इतर दोन मुलींवरील अत्याचारासाठी मरेपर्यंत जन्मठेप अशी शिक्षा सुनावून न्यायालयाने पीडितेला न्याय दिला असून, या निकालाचे संपूर्ण सांगली जिल्ह्यातून स्वागत होत आहे.
