मंडणगड (प्रतिनिधी): तालुक्यातील तिडे निमदेवाडी येथील एका ६५ वर्षीय वृद्ध महिलेचा जंगलातील विषारी ‘रामानंद’ फळ खाल्ल्याने प्रकृती खालावून उपचारादरम्यान मृत्यू झाल्याची दुर्दैवी घटना घडली आहे. लक्ष्मी पांडुरंग निमदे (वय ६५, व्यवसाय-मोलमजुरी, रा. तिडे निमदेवाडी, ता. मंडणगड, जि. रत्नागिरी) असे मृत महिलेचे नाव असून, या घटनेमुळे निमदेवाडी परिसरावर शोककळा पसरली आहे.
मयत महिलेचा मुलगा प्रकाश पांडुरंग निमदे यांनी दिलेल्या माहितीनुसार, २८ सप्टेंबर रोजी लक्ष्मी निमदे यांनी जंगलातील विषारी मानले जाणारे रामानंद फळ खाल्ले होते. त्यानंतर काही वेळातच त्यांना तीव्र विषबाधा होऊन उलट्या व मळमळीचा त्रास सुरू झाला. प्रकृती बिघडल्याचे लक्षात येताच कुटुंबीयांनी त्यांना तातडीने सायंकाळी सात वाजता ग्रामीण रुग्णालय, मंडणगड येथे दाखल केले. तेथे १ ऑक्टोबरच्या दुपारपर्यंत त्यांच्यावर प्राथमिक उपचार सुरू होते. मात्र त्यांची प्रकृती चिंताजनक बनल्याने वैद्यकीय अधिकाऱ्यांनी पुढील उपचारासाठी त्यांना जिल्हा शासकीय रुग्णालयात हलवण्याचा सल्ला दिला.
त्यानुसार १ ऑक्टोबर रोजी रात्री सव्वाआठ वाजता त्यांना रुग्णवाहिकेद्वारे रत्नागिरी येथील सिव्हिल हॉस्पिटलमध्ये आणून अतिदक्षता विभागात (आयसीयू) दाखल करण्यात आले. गेल्या काही दिवसांपासून त्यांच्यावर जिल्हा रुग्णालयातील डॉक्टरांच्या देखरेखीखाली उपचार सुरू होते. मात्र उपचारादरम्यान प्रकृतीत सुधारणा न होता अखेर ५ ऑक्टोबर रोजी पहाटे सव्वादोन वाजण्याच्या सुमारास त्यांची प्राणज्योत मालवली. कर्तव्यावरील वैद्यकीय अधिकाऱ्यांनी त्यांना मृत घोषित केले. या घटनेची नोंद मंडणगड पोलीस ठाण्यात भारतीय नागरिक सुरक्षा संहिता (BNSS) कलम १९४ अन्वये अकस्मात मृत्यू म्हणून करण्यात आली असून, पोलीस पुढील तपास करत आहेत.
