मंडणगड : येथील एका ढाब्यावर काम करताना जिन्यावरून पाय घसरून पडल्याने डोक्याला गंभीर मार लागलेल्या एका ४५ वर्षीय व्यक्तीचा मुंबईतील केईएम रुग्णालयात उपचारादरम्यान मृत्यू झाला आहे. राजेश बबन तांबे (वय ४५, रा. वलोते, ता. मंडणगड, जि. रत्नागिरी) असे मयत व्यक्तीचे नाव असून, याप्रकरणी मंडणगड पोलीस ठाण्यात आकस्मिक मृत्यूची नोंद करण्यात आली आहे.
मिळालेल्या माहितीनुसार, राजेश तांबे हे मंडणगड येथील ‘शिगवण ढाबा’ येथे गेल्या चार वर्षांपासून आचारी (कुक) म्हणून काम करत होते. १ सप्टेंबर रोजी दुपारी तीन वाजण्याच्या सुमारास कामावर असताना जिन्यावरून पाय घसरून ते खाली पडले. या अपघातात त्यांच्या डोक्याच्या मागील बाजूस जबर मार लागल्याने ते जागीच बेशुद्ध पडले. घटनेचे गांभीर्य ओळखून ढाब्याचे मालक वल्लभ शिगवण यांनी त्यांना तातडीने डेरवण येथील रुग्णालयात दाखल केले. तेथे सिटी स्कॅन तपासणीअंती मेंदूत रक्ताच्या गाठी झाल्याचे निष्पन्न झाले व डॉक्टरांनी तत्काळ शस्त्रक्रियेचा सल्ला दिला. त्यामुळे त्यांना अधिक उपचारासाठी २ सप्टेंबर रोजी सकाळी मुंबईतील परळ येथील केईएम रुग्णालयात हलवण्यात आले.
केईएम रुग्णालयात त्यांच्या डोक्यावर तातडीने शस्त्रक्रिया करण्यात आली व त्यांच्यावर अतिदक्षता विभागात महिनाभर उपचार सुरू होते. मात्र उपचारादरम्यान ३ ऑक्टोबर रोजी सकाळी सव्वाअकरा वाजण्याच्या सुमारास त्यांची प्राणज्योत मालवली. तेथील वैद्यकीय अधिकाऱ्यांनी तपासणीअंती त्यांना मयत घोषित केले. या घटनेबाबत मयताचा मुलगा प्रितेश राजेश तांबे याने दिलेल्या खबरीवरून मंडणगड पोलीस ठाण्यात भारतीय नागरिक सुरक्षा संहिता (BNSS) कलम १९४ अन्वये आकस्मिक मृत्यू क्रमांक १७/२०२६ नुसार नोंद करण्यात आली असून पोलीस पुढील तपास करत आहेत.
