लांजा (अरबाज नेवरेकर): तालुक्यातील खेरवसे जाधववाडी परिसरात गेल्या काही दिवसांपासून बिबट्याचा सातत्याने वावर आढळून येत असल्याने स्थानिक नागरिकांमध्ये चिंतेचे आणि दहशतीचे वातावरण निर्माण झाले आहे. बिबट्या थेट मानवी वस्तीच्या आसपास फिरताना दिसत असल्याचे ग्रामस्थांकडून सांगितले जात असून, यामुळे रात्रीच्या वेळी लोकांमध्ये अधिक सावधगिरी पसरली आहे. बिबट्याच्या या वावरामुळे परिसरातील शेतकरी आणि ग्रामस्थांना आपली दैनंदिन कामे करताना किंवा घराबाहेर पडताना प्रचंड काळजी घ्यावी लागत आहे.
परिसरातील पाळीव कुत्रे आणि मांजरे बिबट्याच्या हल्ल्यात सापडल्याची माहिती पुढे आल्यानंतर ग्रामस्थांमध्ये पाळीव प्राण्यांसह गुरांच्या सुरक्षेबाबत गंभीर चिंता व्यक्त केली जात आहे. बिबट्याचा नेमका मुक्काम कोणत्या भागात आहे याचा तातडीने शोध घेणे गरजेचे बनले आहे. या पार्श्वभूमीवर वनविभागाने तत्काळ या संपूर्ण भागाची पाहणी करून बिबट्याच्या हालचालींवर लक्ष ठेवावे, आवश्यक ठिकाणी कॅमेरा ट्रॅप लावावेत तसेच परिसरातील नागरिकांना सुरक्षेच्या आणि खबरदारीच्या उपाययोजनांबाबत मार्गदर्शन करावे, अशी आग्रही मागणी खेरवसे जाधववाडीतील नागरिकांकडून केली जात आहे.
