प्रभानवल्ली / सिकंदर फरास: लांजा तालुक्यातील दुर्गम समजल्या जाणाऱ्या माचाळ गावात स्वातंत्र्यानंतर प्रथमच महाराष्ट्र राज्य मार्ग परिवहन महामंडळाची एसटी बस दाखल झाली असून, या ऐतिहासिक क्षणाचे स्थानिक ग्रामस्थांनी ढोल-ताशांच्या गजरात आणि फित कापून अभूतपूर्व उत्साहात स्वागत केले. आमदार किरण सामंत यांच्याकडे सातत्याने केलेल्या पाठपुराव्याला यश आल्यामुळे गावकरी, वयोवृद्ध आणि विशेषतः शाळकरी विद्यार्थ्यांची वर्षानुवर्षांची पायपीट कायमची थांबली आहे.
माचाळ परिसरातील नागरिकांची वाहतुकीअभावी होणारी गैरसोय आणि विद्यार्थ्यांचे हाल लक्षात घेऊन प्रभानवल्ली पंचायत समिती सदस्य उमेश पत्की यांनी गावात एसटी बस सुरू व्हावी यासाठी सातत्याने पाठपुरावा केला होता. अखेर या प्रयत्नांना यश मिळून गावात पहिल्यांदाच लालपरी पोहोचताच ग्रामस्थांच्या आनंदाला उधाण आले. हा मार्ग सुरू करण्यासाठी एसटी महामंडळाच्या रत्नागिरी विभाग वाहतूक शाखा, लांजा आगाराचे व्यवस्थापक प्रकाश झोरे, ललित आयरे, लांजा स्थानक प्रमुख एस. एस. माळी आणि यशवंत मयेकर यांनी विशेष परिश्रम घेतले. या सेवेसाठी प्रत्यक्ष नियोजन करणाऱ्या सहाय्यक वाहतूक निरीक्षक गणेश कुमार वायदंडे व पंचायत समिती सदस्य उमेश पत्की यांचा ग्रामस्थ आणि लांजा तालुकाप्रमुख गुरुप्रसाद देसाई यांच्या हस्ते शाल व पुष्पगुच्छ देऊन विशेष सत्कार करण्यात आला.
या ऐतिहासिक स्वागत सोहळ्याप्रसंगी सभापती सौ. मानसी आंबेकर, जिल्हा परिषद सदस्या सौ. विनिता गांगण, लांजा तालुकाप्रमुख गुरुप्रसाद देसाई, उप तालुका संघटक चेतन खांदारे यांच्यासह एसटी महामंडळाचे अधिकारी, कर्मचारी आणि माचाळ गावातील ग्रामस्थ मोठ्या संख्येने उपस्थित होते. स्वातंत्र्यप्राप्तीनंतर प्रथमच गावात बस सेवा सुरू झाल्याने समाधान व्यक्त करत विद्यार्थ्यांनी व गावकऱ्यांनी आमदार किरण सामंत यांच्यासह एसटी प्रशासनाचे मनःपूर्वक आभार मानले.
