जयगड/ वैभव पवार: जयगड परिसरातील जिंदाल कंपनीच्या मनमानी कारभाराविरोधात आणि स्थानिकांच्या सुरक्षेसह विविध न्याय मागण्यांसाठी स्थानिक भूमिपुत्र, शेतकरी, मच्छीमार व कामगारांनी जिल्हाधिकारी कार्यालयासमोर सुरू केलेले बेमुदत आमरण उपोषण आता अधिक आक्रमक वळणावर पोहोचले आहे. उपोषणाच्या दुसऱ्याच दिवशी आंदोलनातील सिकंदर खाडे आणि आशिष गडदे या दोन प्रमुख उपोषणकर्त्यांची प्रकृती अचानक खालावल्याने आंदोलनस्थळी मोठी खळबळ उडाली. प्रकृती बिघडल्याचे लक्षात येताच आरोग्य विभागाच्या १०८ रुग्णवाहिका पथकाने तातडीने उपोषणस्थळी धाव घेऊन दोघांची प्राथमिक तपासणी केली. त्यानंतर अधिक उपचारांसाठी त्यांना तात्काळ जिल्हा शासकीय रुग्णालयात दाखल करण्यात आले असून, सध्या त्यांच्यावर वैद्यकीय देखरेखीखाली उपचार सुरू आहेत.
दरम्यान, आपल्या सहकाऱ्यांची तब्येत बिघडल्याची वार्ता पसरताच जयगड पंचक्रोशीतील ग्रामस्थ, शेतकरी आणि मच्छीमार मोठ्या संख्येने जिल्हाधिकारी कार्यालयाबाहेर जमा होऊ लागले आहेत. सुरुवातीला मोजक्या संख्येने सुरू झालेल्या या आंदोलनाला आता परिसरातील नागरिकांचा व्यापक पाठिंबा मिळत असून आंदोलकांची गर्दी झपाट्याने वाढत आहे. संतप्त आंदोलकांनी जिल्हाधिकारी कार्यालय परिसर जोरदार घोषणाबाजीने दणाणून सोडला असून प्रशासनाच्या भूमिकेकडे सर्वांचे लक्ष लागले आहे. स्थानिक कामगार, मच्छीमार आणि प्रकल्पग्रस्तांच्या प्रलंबित मागण्यांवर जोपर्यंत ठोस निर्णय होत नाही, तोपर्यंत हे जनआंदोलन मागे घेणार नाही असा ठाम पवित्रा आंदोलकांनी घेतल्यामुळे परिसरातील वातावरण चांगलेच तापले आहे.
