दापोली : आठवड्याला जोडून आलेल्या सलग सुट्ट्यांची पर्वणी साधत पर्यटकांनी कोकणातील निसर्गरम्य दापोली तालुक्याकडे मोठ्या संख्येने धाव घेतल्याने संपूर्ण किनारपट्टीवर पर्यटन हंगामाची नांदी यंदा नेहमीपेक्षा लवकरच पाहायला मिळत आहे. तालुक्यातील मुरूड, कर्दे, लाडघर, सालदुरे, पाळंदे, आंजर्ले आणि केळशी या निसर्गसुंदर समुद्रकिनाऱ्यांवर पर्यटकांची तुफान गर्दी उसळली असून किनारपट्टीवरील हॉटेल्स व रिसॉर्ट्स पर्यटकांच्या वर्दळीने गजबजून गेले आहेत. गुरुवारपासूनच सुरू झालेला पर्यटकांचा ओघ सलग सुट्ट्यांमुळे अधिकच वाढला असून मुरूडच्या विस्तीर्ण वाळवंटात वॉटर स्पोर्ट्स, समुद्रस्नान, वाळूतील खेळ आणि फोटोग्राफीचा मनमुराद आनंद पर्यटक घेत आहेत; तर शुक्रवारी समुद्रकिनारी पार पडलेल्या गणेश विसर्जन सोहळ्याचे विहंगम दृश्य पाहण्यासाठीही मोठी गर्दी उसळली होती. परतीच्या पावसाने सध्या तरी विश्रांती घेतल्याने सकाळी आल्हाददायक गारवा, दुपारी हलके चटके आणि सायंकाळी मंद वारा अशा सुखावणाऱ्या वातावरणाचा आस्वाद घेत पर्यटकांनी संपूर्ण परिसर फुलवून टाकला आहे.
पर्यटनाचा मुख्य केंद्रबिंदू ठरलेल्या ऐतिहासिक हर्णै बंदरावरील प्रसिद्ध मासळी बाजारात गेल्या दोन दिवसांपासून मोठी लगबग उडाली असून पापलेट, सुरमई आणि ताज्या कोळंबीच्या खरेदीसाठी पर्यटकांसह खवय्यांनी एकच गर्दी केली आहे. प्रथमच हर्णैला भेट देणाऱ्या पर्यटकांसाठी हा मासळी बाजार आणि हातात मासे घेऊन छायाचित्रे काढणे हा एक अनोखा अनुभव ठरत आहे. मात्र वाहनांची रेलचेल वाढल्याने हर्णै परिसरातील अरुंद रस्त्यांवर वाहतूक कोंडीची डोकेदुखीही काही काळ निर्माण झाली होती. गणेशोत्सवामुळे खोल समुद्रातील मोठ्या नौकांची मासेमारी तात्पुरती बंद असल्याने केवळ छोट्या फायबर बोटींतून पहाटे येणाऱ्या मर्यादित मासळीचीच आवक सुरू आहे; परिणामी दर्जेदार मासळीला पर्यटकांकडून वाढती मागणी असताना पुरवठा कमी पडत असल्याचे हर्णै बाजारातील मच्छीमार महिला लक्ष्मी रघुवीर यांनी सांगितले. तरीही आगामी एक-दोन दिवसांत मोठ्या नौका समुद्रात जाताच मासळीची आवक वाढून या पर्यटन हंगामाचा मच्छीमारांना मोठा आर्थिक फायदा होईल, असा विश्वास त्यांनी व्यक्त केला.
या निसर्गरम्य वातावरणाचा आनंद लुटण्यासाठी बारामतीहून सहकुटुंब आलेले पर्यटक अतुल भोसले यांनी प्रतिक्रिया देताना सांगितले की, दापोलीच्या समुद्रात मनसोक्त पोहणे आणि हर्णै बंदरात ताजी मासळी जवळून पाहण्याचा आनंद अवर्णनीय असून संध्याकाळी ताजे मासे खरेदी करूनच ते परतीच्या प्रवासाला निघणार आहेत. दरम्यान, ऑक्टोबरच्या पहिल्या आठवड्यात पुन्हा सलग सुट्ट्या येत असल्याने किनारपट्टीवरील बहुतांश रिसॉर्ट्सचे आगाऊ आरक्षण आधीच पूर्ण झाले आहे. सलग सुट्ट्यांमुळे यंदाचा पर्यटन हंगाम वेळेआधीच अत्यंत जोमाने सुरू झाला असून आगामी काळात स्थानिक पर्यटन आणि हॉटेल व्यवसायाला मोठी आर्थिक उभारी मिळेल, असा आशावाद हॉटेल व्यावसायिक जान्हवी पटणे यांनी व्यक्त केला आहे.
