मुंबई: महाराष्ट्र नवनिर्माण सेनेचे अध्यक्ष राज ठाकरे यांनी निवडणूक प्रक्रियेतील मतदार यादीच्या विशेष सखोल पुनरावलोकनावरून (एसआयआर) सत्ताधाऱ्यांवर टीका केली आहे.
ज्ञानेश्वरांनी रेड्याकडून वेद वदवले होते, आता सत्तेतले रेडे ज्ञानेशाकडून आपले वेद वदवत असल्याची उपरोधिक टीका राज ठाकरे यांनी केली. गेल्या दोन दिवसांपासून ज्ञानेश कुमार गप्प असून त्यांना बोलते करणारेही कुठे दिसत नसल्याचे त्यांनी म्हटले आहे.
भारतीय जनता पक्ष ज्ञानेश कुमार यांच्यासारख्या व्यक्तींना हाताशी धरून आपण सत्तेचा अमरपट्टा घेऊन आलो असल्याचे सांगत होता, हे आता लक्षात आले असेल, असा दावा राज ठाकरे यांनी केला. त्यासाठी २०२५ पासून एसआयआर हे नवे अस्त्र हाती घेण्यात आल्याचेही त्यांनी म्हटले आहे. एसआयआर प्रक्रियेत नेमके काय घोळ झाले आहेत आणि त्यावर निवडणूक आयुक्तच बोलत असल्याचे दिसून येत असल्याने ही संपूर्ण प्रक्रिया रद्द करण्याशिवाय पर्याय नसल्याचे राज ठाकरे यांनी सांगितले.
एसआयआरमध्ये झालेल्या कथित गैरप्रकारांची निष्पक्ष चौकशी करून ही प्रक्रिया नव्याने राबविण्यात यावी, अशी मागणी महाराष्ट्र नवनिर्माण सेनेची असल्याचे त्यांनी स्पष्ट केले. यासाठी देशातील सर्व विरोधी पक्षांनी एकत्र येण्याची गरज असल्याचेही त्यांनी म्हटले आहे. तसेच, भविष्यातील सर्व निवडणुका मतदान यंत्रांवर न घेता पुन्हा मतपत्रिकेद्वारे घेण्यात याव्यात, यासाठी सर्व राजकीय पक्षांनी एकत्र येऊन मोठे आंदोलन उभारावे, असे आवाहन राज ठाकरे यांनी केले.
मतपत्रिकेवर निवडणुका झाल्यास इतक्या वर्षांच्या सत्तेचे सत्य बाहेर येईल, असा दावाही राज ठाकरे यांनी केला. एसआयआर प्रक्रिया रद्द करणे, तिच्यातील कथित घोळांची चौकशी करणे आणि नव्याने प्रक्रिया राबविणे, तसेच मतदान यंत्रांऐवजी मतपत्रिकेवर निवडणुका घेण्याची मागणी या मुद्द्यांवरून राज ठाकरे यांनी निवडणूक प्रक्रियेबाबत आपली भूमिका मांडली.
