नाणीज:जागतिक तापमानवाढीमुळे वाढत्या पर्यावरणीय समस्यांबद्दल लोकांमध्ये जनजागृती निर्माण करण्यासाठी जगद्गुरू श्रीमद् रामानंदचार्य नरेंद्रचार्यजी यांच्या मार्गदर्शनाखाली यंदा सलग चौथ्या वर्षी वसुंधरा पायी दिंड्यांचे आयोजन करण्यात आले आहे. नागपूर, तेलंगणा, परभणी, नाशिक, पुणे, मुंबई आणि गोवा या सात प्रमुख ठिकाणांहून निघाल्याल्या या दिंड्या श्रीक्षेत्र नाणीजधामच्या दिशेने मार्गस्थ झाल्या असून, सोमवार आणि मंगळवारी त्या टप्प्याटप्प्याने नाणीजधाम येथे पोहोचत आहेत.
याशिवाय, श्रीक्षेत्र नाणीजधाम येथील सुंदरगडावर जगद्गुरू श्रीमद् रामानंदचार्य नरेंद्रचार्यजी यांच्या जन्मोत्सव सोहळ्याचा प्रारंभ मंगळवार, दिनांक २० ऑक्टोबरपासून होत आहे.
बुधवार, दिनांक २१ ऑक्टोबर रोजी जन्मोत्सव दिन अत्यंत भक्तीमय वातावरणात साजरा केला जाणार असून, या सोहळ्यासाठी देशाच्या विविध भागातून भाविक मोठ्या संख्येने नाणीजधाम येथे दाखल होत आहेत, ज्यामुळे सुंदरगडावर उत्साहाचे वातावरण पाहायला मिळत आहे.
जन्मोत्सवाच्या निमित्ताने विविध धार्मिक विधी, देवदेवतांना आमंत्रण देणाऱ्या मिरवणुका, सप्तचिरंजीव महामृत्युंजय याग, प्रवचन आणि अभिषेचिंतन सोहळा यांसारख्या विविध कार्यक्रमांचे आयोजन करण्यात आले आहे. या सोहळ्याचे औचित्य साधून जगद्गुरू नरेंद्रचार्यजी यांच्या प्रेरणेने तीन नव्या रुग्णवाहिकांचे लोकार्पण केले जाणार आहे, ज्यामध्ये एका कार्डियाक रुग्णवाहिकेचाही समावेश आहे. रुग्णांना तातडीने वैद्यकीय मदत उपलब्ध व्हावी, यासाठी ही विशेष सेवा पूर्णपणे मोफत दिली जाणार आहे.
