मुंबई: चिपळूण तालुक्यातील दसपटी विभागातील टेरव गावचे सुपुत्र आणि सरस्वती कोचिंग क्लासेसचे प्राचार्य व संचालक श्री. अजित आबाजीराव कदम यांना ‘अभिजित मराठी भाषा सन्मान दिनी’ महाराष्ट्र क्लास ओनर्स असोसिएशनच्या (MCOA) वतीने पद्मश्री डॉ. तात्यासाहेब लहाने यांच्या हस्ते ‘शैक्षणिक उत्कृष्टता पुरस्कार’ देऊन गौरविण्यात आले.
आज ३ ऑक्टोबर रोजी दादर येथील किंग जॉर्ज ऑडिटोरियममध्ये झालेल्या MCOA शिक्षक दिन सोहळ्यात हा सत्कार करण्यात आला. शिक्षण क्षेत्रातील गेल्या ३५ वर्षांच्या प्रदीर्घ, समर्पित आणि उल्लेखनीय कार्याची दखल घेत त्यांना हा सन्मान मिळाला आहे.
विद्यार्थ्यांमध्ये गुणवत्तापूर्ण शिक्षणासोबतच संस्कार आणि सामाजिक जाणीव रुजवण्याचे कार्य त्यांनी केले आहे. त्यांच्या या यशाबद्दल टेरव, चिपळूण आणि दसपटी विभागात आनंदाचे वातावरण असून त्यांच्यावर अभिनंदनाचा वर्षाव होत आहे.
