कसारा: नाशिक आणि त्र्यंबकेश्वर येथे मनोभावे देवदर्शन आटोपून घराकडे परतणाऱ्या भाविकांवर काळाने घाला घातला असून, मुंबई-नाशिक महामार्गावरील आटगाव येथे बुधवारी दुपारी दीडच्या सुमारास झालेल्या भीषण अपघातात दोन निष्पाप बालकांसह चार जणांचा जागीच करुण अंत झाला, तर सात जण जखमी झाले आहेत. मुंबईतील जोगेश्वरी येथे वास्तव्यास असलेले आणि मूळ उत्तर प्रदेशातील गोरखपूर येथील रहिवासी असलेले जैस्वाल कुटुंबातील भाविक देवदर्शनासाठी गेले होते. परतीच्या प्रवासात असताना आटगाव परिसरात त्यांच्या कारचे अचानक ब्रेक फेल झाले आणि त्याच वेळी स्टेअरिंग लॉक झाल्याने चालकाचे वाहनावरील नियंत्रण पूर्णपणे सुटले. नियंत्रण गमावलेली ही वेगवान कार महामार्गाच्या कडेला उभ्या असलेल्या एका जुन्या जळालेल्या ट्रकच्या सांगाड्यावर प्रचंड वेगाने जाऊन आदळली. हा अपघात इतका भीषण होता की कारचा चक्काचूर होऊन आतील भाविकांना ओळखणेही कठीण झाले होते.
या काळीज पिळवटून टाकणाऱ्या दुर्घटनेत श्रीराम जैस्वाल (३४), आयुष जैस्वाल (८), अवंतिका जैस्वाल (११ महिने) आणि सुरज जैस्वाल (२८) या चौघांचा दुर्दैवी मृत्यू झाला. अपघातात गंभीर जखमी झालेल्या राधिका जैस्वाल (३०), संतराम जैस्वाल (५०) आणि अंशिका जैस्वाल (७) यांच्यावर शहापूर उपजिल्हा रुग्णालयात प्राथमिक उपचार करून पुढील उपचारासाठी ठाणे येथील जिल्हा शासकीय रुग्णालयात हलवण्यात आले आहे. तर सुनीता जैस्वाल (३८), शिवम जैस्वाल (१४), सतीश जैस्वाल (२४) आणि सुशी जैस्वाल (१५) यांच्यावर सध्या शहापूर उपजिल्हा रुग्णालयात उपचार सुरू असल्याची अधिकृत माहिती शहापूर पोलिसांनी दिली आहे.
घटनेची माहिती मिळताच आपत्ती व्यवस्थापन पथकाचे सदस्य महेंद्र शिंदे, सुनील करवर, भरत धोंगडे, रुपेश भवारी, भास्कर डिगोरे आणि गणेश शिंदे यांनी स्थानिक नागरिकांच्या मदतीने तत्काळ घटनास्थळी धाव घेत युद्धपातळीवर मदतकार्य सुरू केले. कारमध्ये रक्ताच्या थारोळ्यात अडकलेली निष्पाप लहान मुले आणि इतर भाविकांचे मृतदेह बाहेर काढताना खुद्द मदत पथकातील कर्मचाऱ्यांनाही अश्रू अनावर झाले होते. त्यानंतर शहापूरचे पोलिस निरीक्षक विलास कदम, महामार्ग पोलिस उपनिरीक्षक अशोक बी. पवार आणि पोलिस हवालदार संजय आवटे यांनी तातडीने अपघातग्रस्त वाहने रस्त्यावरून बाजूला करून वाहतूक सुरळीत केली. महामार्गाच्या कडेला तीन वर्षांपूर्वी आगीत खाक झालेला ट्रकचा सांगाडा प्रशासनाने वेळेवर हटवला असता, तर कार त्यावर आदळली नसती आणि हा जीवघेणा अनर्थ सहज टळला असता, असा तीव्र संताप व्यक्त करत स्थानिक नागरिकांनी राष्ट्रीय महामार्ग प्रशासनाच्या अक्षम्य दुर्लक्षावर बोट ठेवले आहे.
