दागिन्यांसाठी केला मावशीचा खून; ४० दिवसांनी भाच्याच्या कृत्याचा पर्दाफाश

जळगाव : पारोळा तालुक्यातील करंजी बु. येथून ३ ऑगस्ट रोजी बेपत्ता झालेल्या ८५ वर्षीय वैजंताबाई गणपत माळी यांच्या मृत्यूचे गूढ अखेर ४० दिवसांनंतर उकलले आहे. दागिन्यांच्या हव्यासापोटी सख्ख्या भाच्यानेच त्यांचा खून केल्याचे स्थानिक गुन्हे शाखेच्या तपासातून समोर आले असून, प्रशांत उत्तम माळी (४०, रा. मुकटी, ता. जि. धुळे) याला पोलिसांनी अटक केली आहे.

वैजंताबाई माळी ३ ऑगस्ट रोजी सकाळी घरातून अचानक बेपत्ता झाल्या होत्या. त्यांच्या कुटुंबीयांनी शोध घेतल्यानंतर ९ ऑगस्ट रोजी पारोळा पोलीस ठाण्यात मिसिंगची नोंद करण्यात आली. वैजंताबाई यांच्या अंगावर सोन्या-चांदीचे दागिने असल्याची माहिती पोलिसांना मिळाल्यानंतर त्यांच्या बेपत्ता होण्यामागे घातपाताची शक्यता व्यक्त करण्यात आली. त्यानंतर पोलीस अधीक्षक श्रीकांत धिवरे यांनी या प्रकरणाचा समांतर तपास स्थानिक गुन्हे शाखेकडे सोपविला.

एलसीबीने तपासासाठी दोन स्वतंत्र पथके कार्यरत केली. पारोळ्यासह धुळे, अमळनेर, धरणगाव, मुक्ताईनगर, यावल आणि जळगाव परिसरात पोलिसांनी शोधमोहीम राबवली. सुमारे २५० किलोमीटरच्या परिसरात तपास करताना १५० पेक्षा अधिक सीसीटीव्ही कॅमेऱ्यांचे फुटेज पोलिसांनी तपासले. या फुटेजमध्ये ३ ऑगस्ट रोजी सकाळच्या सुमारास प्रशांत माळी हा वैजंताबाई यांच्यासोबत असल्याचे दिसून आले. त्यानंतर त्या कारमधून जात असल्याचेही पोलिसांच्या निदर्शनास आले. त्यामुळे तपासाची दिशा प्रशांत माळी याच्याकडे वळली.

तब्बल ४० दिवसांच्या तपासानंतर पोलिसांनी प्रशांतला ताब्यात घेत त्याची कसून चौकशी केली. पोलिसांच्या माहितीनुसार, कर्जाच्या ओझ्याखाली असलेल्या प्रशांतने वैजंताबाई यांच्या अंगावरील दागिने मिळवण्यासाठी त्यांचा खून करण्याचा कट रचला. शिरसोली येथे नातेवाईकाचा मृत्यू झाल्याचे खोटे सांगून त्याने वैजंताबाईंना कारमध्ये बसवले. त्यानंतर धरणगाव, अमळनेर आणि धुळे परिसरात त्यांना फिरवून दागिने देण्याची मागणी केली.

त्यानंतर धुळे येथील नंदाळे फाट्याजवळ महामार्गावर प्रशांतने रुमालाच्या साहाय्याने वैजंताबाईंचा गळा आवळून खून केल्याची कबुली दिल्याचे पोलिसांनी सांगितले. खून केल्यानंतर मृतदेह कारच्या डिक्कीत ठेवण्यात आला. दुसऱ्या दिवशी कानळदा फाट्याजवळील सिमेंटच्या चारीत मृतदेह टाकून दिल्याचे तपासात निष्पन्न झाले.

आरोपीच्या जबाबानंतर पोलिसांनी कानळदा फाट्याजवळील परिसरात शोध घेऊन वैजंताबाई यांचा मृतदेह हस्तगत केला. आरोपीने वैजंताबाईंच्या काही दागिन्यांची धरणगाव, अमळनेर आणि धुळे येथील सोनारांकडे विक्री केल्याचे पोलिसांना सांगितले आहे. उर्वरित दागिने फागणे परिसरात लपवून ठेवल्याची माहितीही त्याने दिल्याने पोलिसांकडून मुद्देमाल हस्तगत करण्याची कारवाई सुरू आहे.

या प्रकरणी सुरुवातीला BNS कलम १३७ (२) आणि १४२ अन्वये गुन्हा दाखल करण्यात आला होता. तपासातून खुनाचा प्रकार स्पष्ट झाल्यानंतर खून तसेच पुरावा नष्ट केल्यासंदर्भातील कलमांची वाढ करण्याची प्रक्रिया पोलिसांकडून सुरू आहे. या प्रकरणाचा पुढील तपास पारोळा पोलीस करीत आहेत.