मुंबई: दिवंगत अभिनेता सुशांत सिंग राजपूत याची माजी व्यवस्थापक दिशा सालियन हिच्या मृत्यूप्रकरणी तब्बल सहा वर्षांनंतर केंद्रीय अन्वेषण विभागाने (सीबीआय) एफआयआर दाखल करताच महाराष्ट्राच्या राजकीय वर्तुळात पुन्हा एकदा जोरदार भूकंप झाला आहे. मुंबई उच्च न्यायालयाच्या आदेशानुसार सीबीआयने सुरू केलेल्या या तपासात दिशाच्या वडिलांनी संशयित म्हणून नमूद केलेल्या नावांच्या आधारे शिवसेना (उद्धव बाळासाहेब ठाकरे) पक्षप्रमुख उद्धव ठाकरे आणि आमदार आदित्य ठाकरे यांच्यासह अनेक व्यक्तींची नावे नोंदवण्यात आल्याने नवा वाद पेटला आहे. या राजकीय गदारोळाच्या पार्श्वभूमीवर युवासेना प्रमुख आदित्य ठाकरे यांनी ‘एक्स’वर थेट भूमिका मांडत विरोधकांच्या आरोपांचा खरपूस समाचार घेतला असून, अफवांचा धुरळा उडवणाऱ्यांना फक्त आणि फक्त तथ्यांच्या आधारे स्पष्टीकरण दिले आहे.
बोंबाबोंब करून केल्या जाणाऱ्या खोट्या चर्चा आणि चालवल्या जाणाऱ्या तथाकथित मिडिया ट्रायल्स कधीही अंतिम सत्य बदलू शकत नाहीत, असा परखड टोला लगावत आदित्य ठाकरे यांनी या प्रकरणाशी आपला कोणताही संबंध नसल्याचे जाहीर केले. आपण दिशा सालियन यांना प्रत्यक्ष आयुष्यात कधीही भेटलेलो नाही किंवा त्यांच्याशी साधी ओळखही नव्हती, असे स्पष्ट करतानाच त्यांनी विरोधकांवर राजकीय षड्यंत्राचा थेट आरोप केला. केवळ राजकीय हेतूने, वैयक्तिक द्वेषापायी आणि हेतुपुरस्सर चारित्र्यहनन करण्याच्या कुटील डावातूनच गेल्या सहा वर्षांपासून कुठलाही पुरावा नसताना आपले नाव या दुर्दैवी घटनेशी ओढले जात असल्याचा संताप त्यांनी व्यक्त केला. चारित्र्यहनन आणि खोट्या प्रचाराच्या माध्यमातून आपल्याला शांत बसवू पाहणाऱ्यांचा तो निव्वळ भ्रम असून, सत्यासाठी आणि अन्यायाविरुद्ध देशवासीयांना सोबत घेऊन आपला लढा असाच सुरू राहील, असा ठाम निर्धारही त्यांनी यावेळी व्यक्त केला.
८ जून २०२० रोजी मुंबईतील मालाड येथील एका निवासी इमारतीच्या १४ व्या मजल्यावरून पडून दिशा सालियनचा गूढ मृत्यू झाला होता. ती तिचा प्रियकर रोहन रॉय याच्या घरी पार्टीसाठी गेली असताना ही घटना घडली होती. या धक्कादायक घटनेनंतर अवघ्या सहा दिवसांत, म्हणजेच १४ जून रोजी अभिनेता सुशांत सिंग राजपूत यानेही आत्महत्या केल्याने या दोन्ही मृत्यूंमागे संशयाचे जाळे निर्माण झाले होते. दरम्यान, या प्रकरणात नाव जोडले गेलेल्या अभिनेता सूरज पंचोली यानेही सोशल मीडियावर सविस्तर निवेदन जारी करत दिशा सालियन किंवा आदित्य ठाकरे यांच्याशी आपली कधीही भेट झालेली नाही, असा मोठा खुलासा करून या वादातील आपले स्थान स्पष्ट केले आहे. राजकीय आरोपांच्या फैरी आणि सीबीआयच्या नव्या कारवाईमुळे हे जुने प्रकरण पुन्हा एकदा राज्याच्या केंद्रस्थानी आले आहे.
