पत्रकार प्रविण कांबळे लिखित-दिग्दर्शित ‘नाडा’ एकांकिकेने मुंबईकरांची मने जिंकली

लांजा/अरबाज नेवरेकर : लांजा तालुक्यातील युवा पत्रकार, लेखक व कलावंत प्रविण कांबळे लिखित व दिग्दर्शित ‘नाडा’ या समाजप्रधान मराठी एकांकिकेचे मुंबईत प्रभावी सादरीकरण झाले. कलारंग थिएटर्स, लांजा या संस्थेच्या कलाकारांनी सादर केलेल्या या एकांकिकेला रसिकांकडून उत्स्फूर्त प्रतिसाद मिळाला.

मुंबईतील टिळकनगर येथील महाराष्ट्र ऐक्यवर्धक मंडळाच्या वतीने आयोजित स्व. सौ. शांताबाई जोग राज्यस्तरीय एकांकिका स्पर्धेत १६ सप्टेंबर रोजी ‘नाडा’चे सादरीकरण करण्यात आले. सामाजिक, शैक्षणिक तसेच उपेक्षित घटकांच्या प्रश्नांना केंद्रस्थानी ठेवत मानवी समाजातील अनिष्ट रूढी, प्रथा-परंपरांविरोधात भाष्य करणाऱ्या या एकांकिकेने प्रेक्षकांना विचार करण्यास प्रवृत्त केले.

पत्रकारितेबरोबरच कथा, कविता आणि राज्यनाट्य स्पर्धेसाठी दोन अंकी नाटकाच्या लेखनाचा अनुभव असलेल्या प्रविण कांबळे यांनी ‘नाडा’चे लेखन केले असून दिग्दर्शनासोबतच अभिनयाची जबाबदारीही त्यांनी सांभाळली. लांजा तालुक्यातील ग्रामीण भागातील नवोदित कलाकारांनी एकांकिकेत भूमिका साकारल्या.

भारत पालवकर, मिथुन कांबळे, सायली भोरे, सलोनी जाधव, चेतन जाधव, विलास कोटकर, संदीप धनावडे यांच्यासह बालकलाकार अर्णव जाधव व समृद्धी पालवकर यांनी भूमिका केल्या. कलाकारांच्या अभिनयाला तांत्रिक टीमची भक्कम साथ लाभली. पार्श्वसंगीत प्रसिद्ध नाट्यसंगीतकार प्रदीप कांबळे, प्रकाशयोजना दयानंद चव्हाण, नेपथ्य विलास कोटकर, विशाल जाधव व सूरज वाडेकर, तर वेशभूषा क्रांती पालवकर यांनी सांभाळली.

एकांकिकेच्या सुरुवातीपासूनच कथानकाने प्रेक्षकांचे लक्ष वेधून घेतले. मध्यंतराकडे जाताना निर्माण होणारा भावनिक ताण आणि शेवटच्या टप्प्यातील परिणामकारक मांडणी यामुळे ‘नाडा’ने प्रेक्षकांच्या मनावर ठसा उमटवला. सादरीकरणानंतर मुंबईतील अनेक मान्यवर व रसिक प्रेक्षकांनी कलाकारांची भेट घेऊन संपूर्ण टीमचे अभिनंदन केले.

प्रविण कांबळे यांच्या लेखन, दिग्दर्शन व अभिनयातील योगदानाचे पत्रकारिता, साहित्य आणि नाट्य क्षेत्रातून कौतुक होत आहे. या उपक्रमासाठी डॉ. संजय बापेरकर, सत्यवान पावसकर, अशोक कदम, संतोष जाधव, अजय कांबळे, दाजी गडहिरे, अनिरुद्ध कांबळे, हनुमंत कदम, सचिन जाधव, संतोष पालवकर आणि सुधीर कोचिरकर यांचे सहकार्य लाभले.