कै. काकासाहेब सरफरे व्याख्यानमाला व मुख्याध्यापक संघाचा संयुक्त उपक्रम; तज्ज्ञांचे मार्गदर्शन व मोफत प्रश्नसंच वाटप
लांजा (अरबाज नेवरेकर): ग्रामीण भागातील विद्यार्थ्यांमध्ये शैक्षणिक गुणवत्ता वाढीस लागावी आणि राष्ट्रीय आर्थिक दुर्बल घटक शिष्यवृत्ती परीक्षेत (NMMS) जास्तीत जास्त विद्यार्थ्यांना यश संपादन करता यावे, या उद्देशाने लांजा येथे विशेष मार्गदर्शन कार्यशाळेचे आयोजन करण्यात आले आहे. कै. काकासाहेब सरफरे स्मृती व्याख्यानमाला आणि लांजा तालुका माध्यमिक व उच्च माध्यमिक शाळा मुख्याध्यापक संघ यांच्या संयुक्त विद्यमाने ही कार्यशाळा रविवार, ४ ऑक्टोबर रोजी आयोजित केली आहे.
न्यू इंग्लिश स्कूल, लांजा येथे सकाळी १० ते सायंकाळी ५ या वेळेत ही दिवसभर चालणारी कार्यशाळा संपन्न होणार आहे. ग्रामीण भागातील प्रतिभावान आणि होतकरू विद्यार्थ्यांना स्पर्धा परीक्षांची योग्य दिशा मिळावी, या उद्देशाने कै. काकासाहेब सरफरे स्मृती व्याख्यानमालेच्या वतीने सातत्याने विविध शैक्षणिक व सामाजिक उपक्रम हाती घेतले जातात. याच परंपरेचा भाग म्हणून यंदा लांजा तालुक्यातील किमान १०० हून अधिक विद्यार्थ्यांना NMMS परीक्षेच्या गुणवत्ता यादीत स्थान मिळवून देण्याचा ठोस संकल्प मुख्याध्यापक संघाने केला असून, या उपक्रमासाठी स्थानिक उद्योजक सुबोध सरफरे यांचे मोलाचे सहकार्य लाभले आहे.
विद्यार्थ्यांच्या सर्वांगीण तयारीसाठी कोल्हापूर येथील अनुभवी व तज्ज्ञ अभ्यासकांची विशेष उपस्थिती या कार्यशाळेत लाभणार आहे. यामध्ये गणित विषयासाठी विलास पाटील, बुद्धिमत्ता चाचणीसाठी रवि मोळे, समाजशास्त्र विषयासाठी प्रकाश गोते आणि विज्ञान विषयाचे सखोल मार्गदर्शन कृष्णा पाटील करणार आहेत. ही तज्ज्ञ मंडळी विद्यार्थ्यांना परीक्षेचे स्वरूप, वेळेचे अचूक नियोजन, कठीण प्रश्न सोडविण्याच्या सोप्या क्लृप्त्या आणि महत्त्वाच्या घटकांची तयारी याविषयी मार्गदर्शन करतील.
याच कार्यशाळेदरम्यान परीक्षार्थींना सरावासाठी उपयुक्त ठरणाऱ्या आदर्श प्रश्नसंचाचे मोफत वाटपही केले जाणार आहे. तालुक्यातील NMMS परीक्षेसाठी प्रविष्ट झालेल्या सर्व विद्यार्थ्यांनी आणि संबंधित शाळांच्या मार्गदर्शक शिक्षकांनी या एकदिवसीय सखोल कार्यशाळेचा लाभ घ्यावा, असे आवाहन संयोजक दत्ताजी कदम आणि उद्योजक सुबोध सरफरे यांनी केले आहे.
