रत्नागिरी : शासकीय वैद्यकीय महाविद्यालय व रुग्णालय, रत्नागिरी येथे अत्याधुनिक वैद्यकीय उपचारांची यशस्वी अंमलबजावणी सुरू असून, गुडघ्यातील तुटलेल्या एसीएल (Anterior Cruciate Ligament) लिगामेंटची दुर्बिणीद्वारे शस्त्रक्रिया यशस्वीपणे करण्यात आली. खासगी रुग्णालयात या शस्त्रक्रियेसाठी मोठा खर्च येत असताना शासकीय रुग्णालयात ही शस्त्रक्रिया रुग्णासाठी मोफत करण्यात आल्याने सर्वसामान्यांसाठी ही मोठी दिलासादायक बाब ठरली आहे.
कराड येथील रहिवासी पांडुरंग सोपान काशीद (३८) यांना सुमारे दोन महिन्यांपूर्वी पायाला गंभीर दुखापत झाली होती. या दुखापतीमध्ये त्यांच्या उजव्या गुडघ्यातील एसीएल लिगामेंट तुटले होते. त्यामुळे त्यांना तीव्र वेदना होत होत्या. चालताना गुडघा लचकणे, तसेच पायऱ्या चढताना आणि उतरताना मोठ्या त्रासाला सामोरे जावे लागत होते. सुरुवातीला त्यांनी बाहेरील ठिकाणी उपचार घेतले; मात्र अपेक्षित सुधारणा न झाल्याने त्यांनी रत्नागिरी येथील शासकीय वैद्यकीय महाविद्यालय व रुग्णालयातील अस्थिरोग विभागाशी संपर्क साधला.
अस्थिरोग तज्ज्ञ डॉ. निखिल देवकर यांनी रुग्णाची तपासणी करून दुर्बिणीद्वारे एसीएल लिगामेंट पुनर्रचना शस्त्रक्रिया करण्याचा निर्णय घेतला. त्यानुसार २९ सप्टेंबर रोजी रुग्णावर आर्थ्रोस्कोपिक एसीएल लिगामेंट रिकन्स्ट्रक्शन ही अत्याधुनिक शस्त्रक्रिया यशस्वीपणे पार पडली. शस्त्रक्रियेदरम्यान गुडघ्यातील तुटलेल्या लिगामेंटच्या जागी नवीन लिगामेंटची पुनर्रचना करण्यात आली. गुंतागुंतीची मानली जाणारी ही शस्त्रक्रिया शासकीय वैद्यकीय महाविद्यालय व रुग्णालयात यशस्वीरीत्या पार पडल्याने रुग्णाला मोठा दिलासा मिळाला आहे.
खासगी रुग्णालयात मोठ्या खर्चाची आवश्यकता असलेल्या या उपचारासाठी शासकीय रुग्णालयात कोणताही खर्च न झाल्याने पांडुरंग काशीद यांनी समाधान व्यक्त केले. त्यांनी अधिष्ठाता डॉ. जयप्रकाश रामानंद, वैद्यकीय अधीक्षक डॉ. विनोद सांगवीकर, अस्थिरोग तज्ज्ञ डॉ. निखिल देवकर, डॉ. हर्षल, भूलतज्ज्ञ डॉ. जमशेर व डॉ. ऐश्वर्या, परिचारक सिद्धेश पालकर तसेच शस्त्रक्रियेसाठी सहकार्य करणाऱ्या संपूर्ण वैद्यकीय पथकाचे आभार मानले. शासकीय रुग्णालयात अत्याधुनिक उपचार सुविधा उपलब्ध करून देत गुंतागुंतीच्या शस्त्रक्रिया यशस्वीपणे केल्या जात असल्याने रुग्णालयाच्या वैद्यकीय पथकाचे कौतुक होत आहे.
