पोलीस निरीक्षक निलकंठ बगळे यांचे ‘डायल ११२’ सह विविध सुरक्षा अभियानांवर महत्त्वपूर्ण मार्गदर्शन
लांजा (अरबाज नेवरेकर): बदलत्या तंत्रज्ञानाच्या युगात वाढत्या सायबर गुन्ह्यांना आळा घालण्यासाठी आणि सर्वसामान्य नागरिकांमध्ये कायदेविषयक सुरक्षिततेची भावना निर्माण करण्यासाठी लांजा पोलिसांच्या वतीने एसटी वर्कशॉप येथे विशेष जनजागृती शिबिराचे आयोजन करण्यात आले. सेवा संकल्प अभियानांतर्गत आयोजित या शिबिरात लांजा पोलीस ठाण्याचे पोलीस निरीक्षक निलकंठ बगळे यांनी एसटी कर्मचाऱ्यांना सायबर सुरक्षा आणि विविध पोलीस उपक्रमांविषयी सविस्तर मार्गदर्शन करत सजगतेचा कानमंत्र दिला.
या वेळी बोलताना पोलीस निरीक्षक निलकंठ बगळे यांनी महाराष्ट्र पोलीस दलाच्या वतीने जनहितार्थ राबविण्यात येणाऱ्या ‘मिशन प्रबोधन’, ‘मिशन रायझिंग फ्लॉवर’, ‘मिशन जीवन’ आणि ‘मिशन टेप फॉर सेल’ यांसारख्या सामाजिक व सुरक्षा अभियानांची सविस्तर माहिती दिली. कोणत्याही आणीबाणीच्या प्रसंगी अथवा संकटाच्या काळात नागरिकांना तात्काळ पोलीस साहाय्य उपलब्ध व्हावे यासाठी ‘डायल ११२’ ही हेल्पलाईन सेवा अत्यंत प्रभावी असून, तिचा योग्य वापर कसा करावा याविषयी त्यांनी कर्मचाऱ्यांना अवगत केले.
दैनंदिन जीवनात इंटरनेट, सोशल मीडिया आणि डिजिटल व्यवहार हाताळताना सायबर भामट्यांपासून स्वतःचे संरक्षण कसे करावे, फसवणूक टाळण्यासाठी कोणती खबरदारी बाळगावी, यावर शिबिरात विशेष भर देण्यात आला. यासोबतच महिला व बालकांची सुरक्षितता, सामाजिक शांततेसाठी कायदा व सुव्यवस्थेचे पालन, नागरिकांची वैयक्तिक सुरक्षा आणि रस्त्यावरील वाहतूक सुरक्षेचे नियम याबाबतही उपस्थितांना मार्गदर्शन करण्यात आले. शिबिराच्या शेवटी उपस्थितांनी डिजिटल सुरक्षिततेचा अवलंब करण्याचा निर्धार व्यक्त करत सायबर सुरक्षेची सामूहिक प्रतिज्ञा घेतली. या प्रबोधनात्मक उपक्रमाला लांजा पोलीस ठाण्याचे एक अधिकारी, दोन अंमलदार तसेच एसटी वर्कशॉपमधील सुमारे ३० कर्मचाऱ्यांची सक्रिय उपस्थिती लाभली होती.
