विलवडे रेल्वे स्थानकावरील उपोषणाच्या पार्श्वभूमीवर लांजा पोलिसांची संघर्ष समितीसोबत बैठक

उपोषण शांततेत पार पाडण्याचे आवाहन; रेल्वे वाहतुकीला अडथळा न आणण्याच्या सूचना

लांजा/ अरबाज नेवरेकर : विलवडे रेल्वे स्थानकातील विविध मागण्यांसाठी विलवडे रेल्वे प्रवासी संघटना व मुंबई ग्रामीण संघर्ष समितीतर्फे २० सप्टेंबर रोजी रेल्वे स्थानक परिसरात लाक्षणिक उपोषण करण्यात येणार आहे. या पार्श्वभूमीवर कायदा व सुव्यवस्था अबाधित राखण्यासाठी लांजा पोलीस ठाण्यात बुधवारी संघर्ष समितीच्या पदाधिकारी व सदस्यांची बैठक घेण्यात आली. पोलीस निरीक्षक निळकंठ बगळे यांच्या उपस्थितीत झालेल्या या बैठकीत उपोषणादरम्यान घ्यावयाच्या खबरदारीबाबत सविस्तर चर्चा करण्यात आली.

उपोषण शांततामय आणि कायदेशीर मार्गाने पार पाडावे, तसेच रेल्वे प्रवासी, रेल्वे वाहतूक अथवा रेल्वे प्रशासनाच्या कामकाजाला कोणत्याही प्रकारचा अडथळा निर्माण होणार नाही, याची दक्षता घ्यावी, अशा सूचना पोलिसांकडून संघर्ष समितीच्या पदाधिकाऱ्यांना देण्यात आल्या. उपोषणाच्या काळात वाद-विवाद, घोषणाबाजीमुळे निर्माण होणारे तणावपूर्ण प्रसंग अथवा अनुचित प्रकार टाळून पोलीस व रेल्वे प्रशासनास सहकार्य करण्याचे आवाहनही करण्यात आले.

बैठकीदरम्यान संघर्ष समितीच्या पदाधिकाऱ्यांकडून त्यांच्या मागण्या आणि संबंधित तक्रारींची माहिती पोलिसांनी जाणून घेतली. कायदा व सुव्यवस्थेचा प्रश्न निर्माण होईल, असे कोणतेही कृत्य करू नये तसेच आपत्कालीन परिस्थिती उद्भवल्यास तत्काळ पोलिसांशी संपर्क साधावा, अशा सूचनाही देण्यात आल्या.

या बैठकीला विलवडे रेल्वे प्रवासी संघटनेचे अध्यक्ष अमोल रेडीज, उपाध्यक्ष भास्कर खामकर, संतोष चव्हाण, दीपक जानकर, सल्लागार सुभाष लाड, जगदीश राजापकर, प्रकाश तोरस्कर तसेच सदस्य तुषार पालकर, युवराज हांडे, विश्वनाथ गुरव, रवींद्र जानकर आणि दीपक तोरस्कर उपस्थित होते.

दरम्यान, संघर्ष समितीच्या पदाधिकाऱ्यांनी उपोषण शांततेच्या वातावरणात आणि कायदेशीर मार्गाने पार पाडण्याची ग्वाही देत पोलीस प्रशासनाला आवश्यक सहकार्य करण्याचे आश्वासन दिले. त्यामुळे बैठक सकारात्मक वातावरणात पार पडली.