गणपतीपुळे (वैभव पवार) : कवितेची राजधानी म्हणून ओळखल्या जाणाऱ्या मालगुंड येथील कवी केशवसुत स्मारक परिसरात आधुनिक मराठी कवितेचे जनक कवी केशवसुत यांच्या पुण्यतिथीनिमित्त त्यांच्या विचार आणि साहित्य कार्याला विनम्र अभिवादन करण्यात आले. केशवसुतांच्या स्मृतिप्रीत्यर्थ आयोजित या कार्यक्रमाच्या निमित्ताने स्मारकात साहित्याचा जागर पाहायला मिळाला.
कार्यक्रमाच्या प्रारंभी स्मारक व्यवस्थापन समितीचे अध्यक्ष गजानन कमलाकर तथा आबा पाटील यांच्या हस्ते स्मारकातील कवी केशवसुतांच्या अर्धाकृती पुतळ्याला पुष्पहार अर्पण करून आदरांजली वाहण्यात आली. त्यानंतर स्मारकातील पद्मश्री मधु मंगेश कर्णिक सभागृहात आबा पाटील यांच्या अध्यक्षतेखाली छोटेखानी अभिवादन समारंभ पार पडला. या वेळी कोकण मराठी साहित्य परिषदेच्या (कोमसाप) मालगुंड शाखाध्यक्षा नलिनी खेर यांच्या हस्ते केशवसुतांच्या प्रतिमेस पुष्पहार घालण्यात आला, तर उपस्थित मान्यवरांच्या हस्ते दीपप्रज्वलन करण्यात आले. या प्रसंगी आबा पाटील आणि नलिनी खेर यांनी उपस्थितांना मार्गदर्शन करताना कवी केशवसुतांच्या युगप्रवर्तक साहित्यिक योगदानावर आणि त्यांच्या पुरोगामी विचारांवर प्रकाश टाकला. या अभिवादन सभेला परिसरातील साहित्यिक व मान्यवर उपस्थित होते.
