गणपतीपुळे (वैभव पवार): रत्नागिरी तालुक्यातील मालगुंड येथे वीरशैव लिंगायत समाज मित्रमंडळाच्या वतीने येत्या २८ व २९ नोव्हेंबर रोजी भव्य जिल्हास्तरीय लिंगायत समाज मर्यादित कबड्डी स्पर्धेचे आयोजन करण्यात आले आहे. या स्पर्धेच्या तिसऱ्या पर्वाचा थरार मालगुंड येथील ग्रामदेवता श्री चंडिका देवी मंदिरालगत असलेल्या राणे क्रीडांगणावर रंगणार असून, या महासंग्रामाच्या पूर्वतयारीला आयोजकांकडून जोरदार सुरुवात झाली आहे.
जिल्ह्यातील लिंगायत समाजातील क्रीडागुणांना हक्काचे व्यासपीठ मिळवून देणे आणि समाजात बंधुभाव वृद्धिंगत करणे या उद्देशाने या स्पर्धेचे आयोजन करण्यात आले आहे. स्पर्धेसाठी राणे क्रीडांगणावर दर्जेदार व सुसज्ज मैदान उभारणीसह सहभागी खेळाडू आणि संघांसाठी आवश्यक त्या सर्व सोयी-सुविधा उपलब्ध करून देण्याबाबत मंडळाकडून नियोजनबद्ध आखणी केली जात आहे. मातीतील जोश, जिद्द आणि ताकदीचा कस लावणारे चुरशीचे सामने या दोन दिवसांत क्रीडाप्रेमींना अनुभवायला मिळणार आहेत.
या जिल्हास्तरीय स्पर्धेत सहभागी होऊ इच्छिणाऱ्या जिल्ह्यातील संघांनी लवकरात लवकर आपली नावनोंदणी पूर्ण करावी, असे आवाहन वीरशैव लिंगायत समाज मित्रमंडळाकडून करण्यात आले आहे. स्पर्धेच्या अधिक माहितीसाठी अथवा नोंदणीसाठी प्रमुख आयोजक विनेश लिंगायत, राकेश लिंगायत, उमेश लिंगायत, रितेश लिंगायत, आनंद लिंगायत आणि आदित्य लिंगायत यांच्याशी संपर्क साधावा, अशी माहिती आयोजकांनी दिली आहे. कबड्डीच्या या भव्य आयोजनामुळे परिसरातील क्रीडारसिकांमध्ये मोठे औत्सुक्य निर्माण झाले आहे.
